ვესტ ჰემი პრემიერ ლიგიდან გავარდნის რეალური საფრთხის წინაშეა

ნიუკასლმა საკუთარ მოედანზე ვესტ ჰემი 3-1 დაამარცხა და ლონდონური კლუბი პრემიერ ლიგიდან გავარდნის პირას მიიყვანა.

მატჩი ემოციური გამოდგა, ნიუკასლი კირან ტრიპიერს დაემშვიდობა, რომელმაც სენტ ჯეიმს პარკზე ბოლო შეხვედრა ჩაატარა.

მასპინძლები მე-15 წუთზე ნიკ ვოლტემადეს სადებიუტო ლიგური გოლით დაწინაურდნენ, რომელმაც ჰარვი ბარნსის პასით ისარგებლა. სულ რაღაც ოთხ წუთში ვილიამ ოსულამ აქსელ დისასის აჯობა და ანგარიში ორამდე გაზარდა.

ვესტ ჰემის მწვრთნელმა ნუნუ ესპირიტუ სანტუმ ტაქტიკა სწრაფადვე შეცვალა, მცველი ჟან-კლერ ტოდიბო გაიყვანა და მოედანზე ტატი კასტელიანოსი შემოიყვანა, რამაც სტუმრების თამაში გამოაცოცხლა.

მეორე ტაიმში ოსულამ ჯო უილოკის ჩაწოდების შემდეგ დუბლი გაიფორმა და ანგარიში 3-0 გახდა. რამდენიმე წუთში კასტელიანოსმა ერთი ბურთი ეფექტური დარტყმით კი გაქვითა და მოგვიანებით ხარიხასაც გაარტყა ბურთი, თუმცა ლონდონელების გადასარჩენად ეს საკმარისი არ აღმოჩნდა.

ამ მარცხის შემდეგ ვესტ ჰემის პრემიერლიგიდან გავარდნა შესაძლოა ოფიციალურად სამშაბათსვე დადასტურდეს, თუ ტოტენჰემი ჩელსისთან მატჩში ქულებს მოიპოვებს.