საქართველოს ეროვნულმა ნაკრებმა 11 ნოემბერს, შეკრების მეორე ვარჯიში მიხეილ მესხი 2-ზე ჩაატარა. ფეხბურთის ფედერაციის პრესსამსახური ბუდუ ზივზივაძეს გაესაუბრა.
"ვემზადებით ბოლო ორი მატჩისთვის. გუნდში, როგორც ყოველთვის, კარგი განწყობაა. ამ ორ თამაშში ვეცდებით, ოქტომბერში დაშვებული შეცდომები გამოვასწოროთ, ხასიათი გამოვიკეთოთ და ახალ სანაკრებო სეზონს დადებითად შევხვდეთ.
ფიზიკურად თავს უკეთ ვგრძნობ. ოქტომბრის მატჩებამდე, კლუბში დისკვალიფიკაციის გამო, სათამაშო პრაქტიკა არ მქონდა, ხოლო სანაკრებო პაუზის შემდეგ შეხვედრები ჩავატარე და გოლიც გავიტანე, რაც თავდაჯერებას მმატებს.
თუ მოახლოებულ მატჩებში თამაშის საშუალება მომეცემა, ყველაფერს გავაკეთებ, რომ საქართველოს ნაკრებს წარმატების მიღწევაში დავეხმარო", - თქვა ზივზივაძემ.
ბუდუს საქართველოს ნაკრების მაისურით ჩატარებულ 38 მატჩში 8 გოლი და 2 ასისტი აქვს აქტივში. ბოლო საგოლე მოქმედება 2024 წლის 9 ივნისს ჰქონდა - მონტენეგროს გაუტანა.
2026 წლის მსოფლიო ჩემპიონატის შესარჩევი ეტაპის ეგიდით, ჩვენი გუნდი 15 ნოემბერს, დინამო არენაზე, ესპანეთის ნაკრებს უმასპინძლებს, 18 ნოემბერს კი სოფიაში, ბულგარეთის ნაკრებთან ითამაშებს.
ფოტო: საქართველოს ფეხბურთის ფედერაცია
