ვიდალი: „რეალმა VAR-ი გამოიგონა“

ჩილელმა ნახევარმცველმა, არტურო ვიდალმა, მადრიდის რეალის მიმართ მორიგი სკანდალური და კრიტიკული განცხადება გააკეთა

გადაცემა Enfocados-ში სტუმრობისას ვეტერანმა ფეხბურთელმა აღნიშნა, რომ „სამეფო კლუბთან“ გამართული თითოეული შეხვედრა მასში უსამართლობისა და ძარცვის განცდას ტოვებდა. ვიდალის თქმით, მსაჯების მხრიდან დაშვებული შეცდომები იმდენად ხშირი და თვალსაჩინო იყო, რომ ფეხბურთში ვიდეორეფერის (VAR) სისტემის დანერგვა სწორედ მადრიდელთა გარშემო არსებულმა დაპირისპირებებმა დააჩქარა.

ყოველ ჯერზე, როცა რეალის წინააღმდეგ ვთამაშობდი, ვგრძნობდი, რომ გვძარცვავდნენ

ფეხბურთელმა ირონიულად „მადლობაც“ კი გადაუხადა მადრიდულ გრანდს და აღნიშნა, რომ მათ მიერ გამოწვეული ძარცვის სიმრავლის გამო გახდა აუცილებელი ტექნოლოგიური ჩარევა.

შეგახსენებთ, რომ ვიდალსა და რეალს შორის დაპირისპირება წლებს ითვლის, განსაკუთრებით კი 2017 წლის ჩემპიონთა ლიგის შემდეგ, როდესაც ბაიერნის რიგებში მოთამაშე ჩილელი მოედნიდან სადავო ვითარებაში გააძევეს. მას შემდეგ, არტურო ვიდალი, რომელიც მოგვიანებით ბარსელონას ღირსებასაც იცავდა, მადრიდელთა ერთ-ერთ ყველაზე ხმამაღალ კრიტიკოსად რჩება.