VIDEO: ახალი არგენტინა - ალბისელესტემ ბურკინა ფასო გაანადგურა

არგენტინის ნაკრებმა ბუენოს აირესის ესტადიო მონუმენტალზე გამართულ ამხანაგურ მატჩში ბურკინა ფასო 7:0 გაანადგურა.

ეს „ალბისელესტესთვის“ ბოლო 17 შეხვედრაში მე-16 გამარჯვება იყო (1 მარცხი). ეს გუნდები ერთმანეთს ისტორიაში პირველად დაუპირისპირდნენ და ორივე ნაკრები მატჩს გამარჯვებისა და მშრალად შენახული კარის შემდეგ შეხვდა.

თუმცა, FIFA-ს რეიტინგში მათ შორის 60-ადგილიანი სხვაობის გათვალისწინებით, არგენტინა უდავო ფავორიტი იყო.

მასპინძლებმა შეხვედრა ძალიან აქტიურად დაიწყეს და ანგარიშის გასახსნელად მხოლოდ 4 წუთი დასჭირდათ.

საჯარიმოში აგუსტინ ჯაის წაქცევისთვის მუმუნი დიალომ ყვითელი ბარათი მიიღო, არგენტინამ კი პენალტის შესრულების უფლება მოიპოვა.

ლაუტარო მარტინესის პირველი დარტყმა აბდულ გირამ მოიგერია, თუმცა დამატებაზე მარტინესმა შეცდომა აღარ დაუშვა.

დიალოსთვის მდგომარეობა კიდევ უფრო დამძიმდა, 4 წუთის შემდეგ, დარტყმის დაბლოკვის მცდელობისას, მან ბურთი საკუთარ კარში ჩაჭრა და მასპინძლები 2:0 დაწინაურდნენ.

მატჩის დაწყებიდან მხოლოდ 8 წუთი იყო გასული, მაგრამ შეხვედრის ბედი თითქმის გადაწყვეტილი ჩანდა. მალევე ანგარიში 3:0 გახდა, მარტინესის გადაცემის შემდეგ ჯანლუკა პრესტიანიმ საჯარიმოს ცენტრიდან ბურთი კარის ქვედა მარცხენა კუთხეში ზუსტად გადაგზავნა.

ამირ აბდუს გუნდი შოკში იყო და დიდი ანგარიშით მარცხის თავიდან ასაცილებლად დაცვაში თამაშის დალაგება სასწრაფოდ სჭირდებოდა.

თუმცა, ბურთის ფლობის 75%-ზე მეტი მაჩვენებლით არგენტინა თამაშს სრულად აკონტროლებდა და მე-4 გოლს ეძებდა.

დაახლოებით 20-წუთიანი პაუზის შემდეგ, ბურკინა ფასომ რამდენიმე წუთში კიდევ ორი გოლი გაუშვა.

ჯერ ნიკო პასმა საჯარიმოს მარჯვენა მხრიდან დაბალი დარტყმით ანგარიში 4:0 გახადა, შემდეგ კი პრესტიანის კარგი თამაშის შემდეგ ხულიან ალვარესმა შესანიშნავი დარტყმით მეხუთე გოლიც გაიტანა.

სტუმრები მძიმე მდგომარეობაში აღმოჩნდნენ, თუმცა რამდენიმე სახიფათო მომენტის მიუხედავად, შესვენებამდე მეტი გოლი აღარ გაუშვიათ.

მეორე ტაიმის დასაწყისში ორივე მწვრთნელმა არაერთი ცვლილება განახორციელა. ლიონელ სკალონიმ რამდენიმე საკვანძო ფეხბურთელს დასვენების საშუალება მისცა, ხოლო აბდუ დემორალიზებული გუნდის თამაშის გამოცოცხლებას ახალი ძალებით შეეცადა.

თუმცა, 57-ე წუთზე არგენტინამ კარგად გათამაშებული კომბინაციის შემდეგ მეტოქის მდგომარეობა კიდევ უფრო დაამძიმა.

რამდენიმე სწრაფი გადაცემის შემდეგ მარტინესმა თავისუფალ სივრცეში ფრანკო მასტანტუონო მოძებნა, რომელმაც შეტევა ზუსტი დარტყმით დაასრულა და ანგარიში 6:0 გახადა. ამ დროისთვის მატჩის დასრულებამდე ჯერ კიდევ 30 წუთზე მეტი რჩებოდა.

მე-6 გოლის შემდეგ ორივე მწვრთნელმა დამატებითი ცვლილებები განახორციელა და თამაშის ტემპიც შემცირდა. „ალბისელესტე“ ბურთის კონტროლით კმაყოფილი იყო და ბოლო 20 წუთი შედარებით მშვიდად წარიმართა.

მიუხედავად ამისა, არგენტინამ მე-7 გოლის გატანაც მოასწრო. მსაჯის მიერ კომპენსირებულ დროში ჯულიანო სიმეონემ ახლო მანძილიდან თავური დარტყმით საბოლოო ანგარიში - 7:0 დააფიქსირა და ბურკინა ფასოს მძიმე საღამო კიდევ უფრო დაამძიმა.

ამ გამარჯვების შემდეგ არგენტინას ბოლო ორ შეხვედრაში უკვე 11 გოლი აქვს გატანილი, ხოლო ბურკინა ფასომ ბოლო 7 მარცხიდან 6 მატჩში მეტოქის კარის აღება ვერ მოახერხა.

მომდევნო მატჩს არგენტინა 7 ოქტომერს ბენინის წინააღმდეგ გამართავს, სადაც ლიონელ მესის ნაკრებიდან გაცილების ცერემონია გაიმართება.