VIDEO: დაგეგმილი გამარჯვება - საქართველომ ისრაელი დამაჯერებლად დაამარცხა

საქართველოს კალათბურთის ეროვნულმა გუნდმა, მსოფლიო ჩემპიონატის საკვალიფიკაციო ეტაპის მატჩებისთვის მომზადების ფარგლებში, ისრაელთან ამხანაგური მატჩი გამართა.

თბილისში, ოთარ ქორქიასა და ნოდარ ჯორჯიკიას სახელობის სპორტის სასახლეში, ჩვენმა ნაკრებმა ისრაელელებს 11-ქულიანი სხვაობით აჯობა - 101:90.

შეხვედრის ყველაზე შედეგიანი მოთამაშე გოგა ბითაძე იყო (22 ქულა), სანდრო მამუკელაშვილმა 20 ქულა მიითვალა, თორნიკე შენგელიამ - 17, ხოლო რატი ანდრონიკაშვილმა - 12.

შეგახსენებთ, საქართველოს ნაკრებმა მსოფლიო ჩემპიონატის შესარჩევი ეტაპის მეორე რაუნდში თამაშის უფლება მოიპოვა და ჯგუფში მონტენეგროსთან, პორტუგალიასთან და საბერძნეთთან 2-2 თამაშს ჩაატარებს.

ალეკსანდარ ჯიკიჩის გუნდი, 28 აგვისტოს, მონტენეგროს თბილისში უმასპინძლებს, ხოლო 31-ში პორტუგალიას სტუმრად შეხვდება.