VIDEO: დომინანტური გამარჯვება - ნიგერია 1/2 ფინალში მაროკოს შეხვდება

აფრიკის თასის 1/4 ფინალში, 3-გზის ჩემპიონმა ნიგერიის ნაკრებმა 2-გზის ჩემპიონი ალჟირი დომინანტურად დაამარცხა და შემდეგ ეტაპზე გავიდა - 2:0.

დომინანტურად, რადგან უდიდესი უპირატესობა ჰქონდა და მეტოქეს კარისკენ სულ 3 დარტყმის შესრულების საშუალება მისცა - ალჟირელთა XG-მ 0.13 შეადგინა, ნიგერიელებისამ - 2.92.

გამორჩეული იყო ვიქტორ ოსიმენი, რომელმაც ჯერ ანგარიში გახსნა, ხოლო შემდეგ აკორ ადამსს საგოლე პასი გაუკეთა. 

ნაპოლის ყოფილმა და გალათასარაის ამჟამინდელმა ფორვარდმა მიმდინარე ტურნირზე მე-4 გოლი შეაგდო და მთავარ ბომბარდირ მაროკოელ ბრაიმ დიასს 1 გოლამდე მიუახლოვდა.

ვიქტორს 6 საგოლე მოქმედება მოუგროვდა (2 ასისტიც აქვს), რაც მხოლოდ მისსავე თანაგუნდელ ადემოლა ლუკმენის შედეგს (3 გოლი, 4 ასისტი) ჩამორჩება.

ნიგერიის ნაკრები, რომელმაც მიმდინარე ტურნირზე ჩატარებული 5-ვე თამაში მოიგო, 1/2 ფინალში მასპინძელ მაროკოს ნაკრებს შეხვდება. მაროკოელებს აგვისტოს შემდეგ, 22-მატჩიანი დაუმარცხებელი სერია აქვთ.

მეორე 1/2 ფინალში მეტოქეს ელოდება 2021 წლის ჩემპიონი სენეგალი, რომელსაც ფინალის საგზურისთვის 7-გზის ჩემპიონი რეკორდსმენი ეგვიპტე ან მოქმედი ჩემპიონი კოტ დ'ივუარი დაუპირისპირდება.