VIDEO: ,,დრო დაგვჭირდება" - ლებრონის დებიუტი ფილადელფიაში შედგა

ლებრონ ჯეიმსმა ფილადელფია სიქსერსის შემადგენლობაში სადებიუტო მატჩის შემდეგ, რომელიც მისი გუნდის მარცხით დასრულდა, განაცხადა, რომ ახალ თანაგუნდელებთან შეთამაშებას გარკვეული დრო დასჭირდება.

41 წლის ამერიკელი კალათბურთელი ფილადელფიას ივლისში შეუერთდა და, როგორც თავად აცხადებს, ეს NBA-ში მისი კარიერის ბოლო კონტრაქტი იქნება.

ჯეიმსი NBA-ის ისტორიაში ყველაზე მეტი ქულის ავტორია და ლიგაში რეკორდულ, 24-ე სეზონს იწყებს.

ბრუკლინ ნეტსთან წინასასეზონო შეხვედრაში, რომელიც ფილადელფიამ ანგარიშით 108:114 წააგო, ჯეიმსმა პირველ ტაიმში 18 წუთი ითამაშა და 10 ქულა, 4 მოხსნა, 5 შედეგიანი გადაცემა და 1 ჩაჭრა მიითვალა.

„ჯერ კიდევ ვცდილობთ, ერთმანეთს წარმატების მისაღწევად საუკეთესო პირობები შევუქმნათ და მოედანზე ერთმანეთის შესაძლებლობები მაქსიმალურად შევავსოთ. თუმცა ამას გარკვეული დრო დასჭირდება.

დღევანდელი მატჩი კარგი გამოცდილება იყო, რომელზეც მომავალში შეგვიძლია დავაშენოთ ჩვენი თამაში“, - განაცხადა ჯეიმსმა.

ლებრონმა მოედანზე ახალ თანაგუნდელებთან - ჯოელ ემბიდთან, ვიჯეი ეჯკომბთან, ტაირის მაქსისა და ჯეილენ ბრაუნთან ერთად ითამაშა. ამ უკანასკნელმა 18 ქულა ჩააგდო და გუნდის ყველაზე შედეგიანი კალათბურთელი გახდა.

ჯეიმსმა NBA-ის ჩემპიონობა ყველა იმ გუნდთან ერთად მოიპოვა, რომლის შემადგენლობაშიც უთამაშია. მან 2-ჯერ გაიმარჯვა მაიამი ჰიტთან, ერთხელ კლივლენდ კავალიერსთან და ერთხელ ლოს ანჯელეს ლეიკერსთან ერთად.

ამ ზაფხულს ლებრონმა ლეიკერსი დატოვა, სადაც 8 წელი გაატარა.

ჯეიმსი NBA-ის რეგულარული სეზონის ყველაზე ღირებულ მოთამაშედ (MVP) 4-ჯერ დასახელდა, ყველა ეს ჯილდო მან 2009-2013 წლებში მოიპოვა.

გარდა ამისა, ბოლო 22 სეზონის განმავლობაში ის ყოველწლიურად NBA-ის ყველა ვარსკვლავის მატჩის მონაწილე იყო.

ახლა ლებრონის მიზანია, ფილადელფია სიქსერსს 43-წლიანი პაუზის შემდეგ NBA-ის ჩემპიონობის მოპოვებაში დაეხმაროს.