VIDEO: ძმების საგოლე კომბინაცია - საინტერესო ბოლო წუთები ქუთაისში

ეროვნული ლიგის მე-11 ტური ქუთაისში, ტორპედოსა და რუსთავის მატჩით გაიხსნა. გუნდებმა გოლები ბოლო წუთებზე გაცვალეს და თითო-თითო ქულა აიღეს - 1:1.

იმერლები 33-ე წუთიდან კაცნაკლული მას შემდეგ დარჩნენ, რაც გიორგი ყრუაშვილმა მოედნიდან ვარლეი გააძევა. ბრაზილიელმა ლეგიონერმა პირდაპირ წითელი ბარათი ბოლო იმედის ჯარიმისთვის მიიღო.

88-ე წუთზე, რუსთაველები დააწინაურა ცვლილებაზე შესულმა ნიკოლოზ ქუთათელაძემ, რომელსაც საგოლე პასი თავისმა ძმამ, 18 წლის ალექსანდრე ქუთათელაძემ გაუკეთა. ალექსანდრეს ეროვნულ ლიგაში დებიუტი ჰქონდა და 5 წუთი ეყო იმისთვის, რომ ასისტი შეესრულებინა.

10-კაციანმა ტორპედომ ქულის გადარჩენა მაინც მოახერხა - გიორგი კოხრეიძის გარღვევისა და პასის შემდეგ, კომნენ ანდრიჩმა მიმდინარე ჩემპიონატში თავისთვის მე-3 გოლი გაიტანა.

11 მატჩის შედეგად, ტორპედომ 16 ქულა მოაგროვა, დილას გაუთანაბრდა და მე-2 ადგილოსან რუსთავთან ქულათა სხვაობა კვლავ 3-ია - ლიდერ იბერიას 4 ქულით მეტი აქვს. ამ ტურის დანარჩენი 4 შეხვედრა 6-7 მაისს გაიმართება.

ქუთაისური კლუბი შემდეგ ტურში, 10 მაისს, იბერია 1999-ს ესტუმრება, ხოლო რუსთავი, 11 მაისს, დინამო თბილისს უმასპინძლებს.