VIDEO: ისტორიაში ყველაზე ასაკოვანი - ვენუს უილიამსმა AO-ს რეკორდი დაამყარა

ვენუს უილიამსმა ავსტრალიის ღია პირველობის ისტორია დაწერა და ტურნირის ყველაზე ასაკოვანი მონაწილე გახდა.

ლეგენდარულმა ამერიკელმა, 45 წლისა და 215 დღის ასაკში, სერბ ოლგა დანილოვიჩთან ითამაშა და 3-სეტიან რთულ ბრძოლაში დამარცხდა - 7:6; 3:6; 4:6. დანილოვიჩი მასზე 21 წლის უმცროსია.

ვენუსმა AO-ზე გააუმჯობესა იაპონელი კიმიკო დატეს რეკორდი, რომელმაც 2015 წლის ტურნირზე 44 წლის ასაკში ითამაშა.

ვენუს უილიამსი AO-ზე პირველად 1998 წელს გამოვიდა, მას შემდეგ კი საუკეთესო შედეგი ორჯერ ჰქონდა - 2003 და 2017 წლებში ფინალში გავიდა და ორივე შემთხვევაში უმცროს და სერენასთან დამარცხდა.

უფროსი უილიამსი დიდი სლემის ტურნირების 7-გზის ჩემპიონია - 5-ჯერ უიმბლდონი მოიგო, ხოლო 2-ჯერ ამერიკის ღია პირველობა. ავსტრალიაში წაგებული 2 ფინალის გარდა, 1 ფინალი აქვს წაგებული როლან გაროსზეც.