VIDEO: მიმდინარე სეზონში პირველად - რა შედეგი დააფიქსირა დინამო ბათუმმა?

მიმდინარე სეზონში პირველად, დინამო ბათუმმა ეროვნული ლიგის თანალიდერის სტატუსი მოიპოვა.

ჩემპიონატის 25-ე ტურში, ბათუმი არენაზე, გიორგი ჭიაბრიშვილის გუნდმა მოქმედ ჩემპიონ იბერია 1999-ს ორბურთიანი სხვაობით მოუგო - 2:0.

ანგარიში ბრაზილიელმა მაურიდეშმა გახსნა, ხოლო მეორე გოლი თორნიკე კირკიტაძემ შეაგდო. ასისტების დუბლი შეასრულა ულად ომარ იმრანმა.

ცალკე აღსანიშნავია კირკიტაძის ფანტასტიკური სათამაშო ფორმა - საგოლე მოქმედება ეროვნული ლიგის ზედიზედ მე-6 შეხვედრაში შეასრულა (2 გოლი, 5 ასისტი).

შედეგად, ბათუმელებმა ზედიზედ მე-5 ტურში გაიმარჯვეს, 43 ქულა მოაგროვეს და გაუთანაბრდნენ უკვე თანალიდერ რუსთავს, რომელმაც ერთ-ერთ აუტსაიდერ სპაერთან სტუმრად 1:1 ითამაშა.

მეორე მხრივ აღსანიშნავია, რომ ამ მომენტისთვის პოტენციურ ლიდერად დინამო თბილისი უნდა მივიჩნიოთ, რადგან რუსთაველებსა და ბათუმელებზე 5 ქულითა და 2 მატჩით ნაკლები აქვს.

13 სექტემბერს, დინამო ბათუმი დილას გორში ესტუმრება, ხოლო იბერია 1999, რომელიც 37 ქულით მე-4 ადგილს ინარჩუნებს, იმავე დღეს სპაერს უმასპინძლებს.