VIDEO: მუსლერას გოლი - გალათასარაიმ მე-5 ვარსკვლავი მოიპოვა

თურქეთის სუპერ ლიგის 36-ე ტურში გალათასარაიმ საკუთარ მოედანზე ქაისერისპორი მიიღო და 3-0 დაამარცხა.

ამ გამარჯვებით სტამბოლურმა გუნდმა ჩემპიონატის დასრულებამდე 2 ტურით ადრე მდევარ ფენერბაჰჩეს 8 ქულით გაასწრო და ჩემპიონობა გაინაღდა.

გუნდმა ქვეყნის ჩემპიონატი ისტორიაში 25-ედ მოიგო, ეს კი იმას ნიშნავს, რომ გალათასარაი გახდება პირველი თურქული კლუბი, რომელიც ლოგოზე მე-5 ვარსკვლავს დაიტანს (1 ვარსკვლავი = 5 ტიტული).

საჩემპიონო თამაშში თავისი მორიგი გოლი გაიტანა ვიქტორ ოსიმენმა, რომელსაც ჩემპიონატის ამ სეზონში უკვე 25 გოლი დაუგროვდა და ბომბარდირთა დავას ერთპიროვნულად ლიდერობს.

როცა ანგარიში 2-0 იყო, გალათასარაიმ პენალტის დარტყმის უფლება მიიღო, რომელიც გუნდის ლეგენდარულმა მეკარე ფერნანდო მუსლერამ შეასრულა და გოლიც გაიტანა.

38 წლის ურუგვაელმა, რომელიც გალათასარაის კარს 14 წელია იცავს, სტამბოლურ გუნდში მე-19 ტიტული მოიგო, რითიც თურქული ფეხბურთის ისტორიაში ყველაზე ტიტულოვანი ფეხბურთელი გახდა.