VIDEO: სუპერ გოლიიიი - ანდრონიკაშვილმა უზბეკეთში შედევრი შექმნა

სანდრო ანდრონიკაშვილმა უზბეკეთის სუპერ ლიგის მიმდინარე სეზონის 11 ტურში 3 საგოლე მოქმედება მოაგროვა.

ონდიჯანის ქართველმა საყრდენმა ნახევარმცველმა, ჩემპიონატის მე-11 ტურის გასვლით მატჩში, ხორაზმ ურგანჩთან ანგარიში ულამაზესი დარტყმის შედეგად გახსნა. მისმა გუნდმა თამაში 3:0 მოიგო. 

ანდრონიკაშვილმა, რომელიც ონდიჯანს ზამთარში, გორის დილადან შეუერთდა, მიმდინარე სეზონში მე-2 გოლი გაიტანა - აქტივში 1 საგოლე პასიც აქვს.

სანდრომ მთელი შეხვედრა სრულად ჩაატარა, ხოლო ონდიჯანის კიდევ ერთმა ქართველმა, იმედა აშორტიამ დამატებულ წუთებამდე ითამაშა და 94-ეზე შეცვალეს.

ქართველების გუნდმა ზედიზედ მე-3 თამაში მოიგო, 16 ქულა დააგროვა და სატურნირო ცხრილის მე-7 ადგილამდე დაწინაურდა - სამეულთან სხვაობა 4 ქულაა.

უზბეკეთის სუპერ ლიგაში დიდი შესვენება გამოცხადდა და ჩემპიონატი 20 ივლისს განახლდება.