ვინ არიან საქართველოს ნაკრების მეტოქეები ქალთა ერთა ლიგაზე

3 ნოემბერს ნიონში გამართული წილისყრის შედეგად, 2027 წლის ქალთა ერთა ლიგაზე საქართველოს ეროვნული ნაკრების მეტოქეების ვინაობა გაირკვა.

ირის ანტმანის გაწვრთნილი გუნდი C ლიგის მეორე ჯგუფში მოხვდა, სადაც პირველობისთვის ლატვიას, აზერბაიჯანსა და ლიხტენშტაინს დაუპირისპირდება.

რაც შეეხება ტურნირის ფორმატს და დაწინაურების პირობებს, მომდევნო ეტაპზე, კერძოდ B ლიგაში პირდაპირ გადასვლას C ლიგის ექვსივე ჯგუფის გამარჯვებული ნაკრები შეძლებს. გარდა ამისა, საუკეთესო შედეგის მქონე ორი მეორეადგილოსანი პლეი-ოფში ითამაშებს, რითაც ზედა ლიგის საგზურის მოპოვების დამატებითი შესაძლებლობა მიეცემა.

ქალთა ერთა ლიგის ჯგუფური ეტაპის შეხვედრები გაზაფხულსა და ზაფხულის დასაწყისში გადანაწილდება. მატჩები 2027 წლის თებერვალ-მარტში, აპრილსა და ივნისში ჩატარდება.