20 ნოემბერს ნიონში გამართული ერთა ლიგის წილისყრის შედეგებს ფარერის კუნძულების მთავარი მწვრთნელი, აიუნ კლაკსტინი გამოეხმაურა.
მარტში მისი გუნდი B ლიგაში გადასასვლელად (ან დასარჩენად) საქართველოს ნაკრებს დაუპირისპირდება, რაც ფარერებისთვის ამ დონის პლეი-ოფში თამაშის პირველი ისტორიული გამოცდილება იქნება.
კლაკსტინმა აღნიშნა, რომ მიუხედავად ფიფას რეიტინგში არსებული 50-საფეხურიანი სხვაობისა, მაღალ დივიზიონებში დასამკვიდრებლად სწორედ ასეთი ძლიერი მოწინააღმდეგეების დამარცხებაა აუცილებელი. მისი თქმით, ნაკრებისთვის ეს ორთაბრძოლა უდიდესი შანსი და, ამავდროულად, ძალიან დიდი გამოწვევაა.
საქართველოს ნაკრები ფიფას რეიტინგში ჩვენზე 50 პოზიციით მაღლა დგას, მაგრამ თუ გვინდა, ერთა ლიგის უფრო ძლიერ დივიზიონებში ვითამაშოთ, ამისთვის სწორედ ასეთი მეტოქეების დამარცხებაა საჭირო
მთავარმა მწვრთნელმა ხაზი გაუსვა თავისი გუნდის პროგრესს და მარტის შეხვედრებს წინ გადადგმულ მორიგ ნაბიჯად განიხილავს. მან საკუთარ გულშემატკივრებს დაჰპირდა, რომ სასურველი შედეგის მისაღწევად მაქსიმუმს გაიღებენ და დასძინა, რომ საქართველოს ნაკრების დამარცხება სრულიად შესაძლებელია.
ამ გუნდებს შორის პირველი მატჩი 27 მარტს ფარერებზე გაიმართება, საპასუხო შეხვედრას კი ჯვაროსნები 30 მარტს საკუთარ მოედანზე ჩაატარებენ.