20 ნოემბერს ნიონში გამართული წილისყრის შედეგად გაირკვა, რომ ერთა ლიგის B დივიზიონში ადგილის შესანარჩუნებლად საქართველოს ნაკრები ფარერის კუნძულებს შეხვდება.
პირველი დაპირისპირება 27 მარტს სტუმრად გაიმართება, საპასუხო მატჩს კი ჯვაროსნები 30 მარტს საკუთარ მოედანზე ჩაატარებენ.
წილისყრის დასრულებისთანავე, ცნობილმა სტატისტიკურმა პორტალებმა საკუთარი პროგნოზები გამოაქვეყნეს. Football Meets Data-ს სუპერკომპიუტერის მიხედვით, რამაზ სვანაძის გუნდი წყვილში გამოკვეთილი ფავორიტია და გამარჯვების 73%-იანი შანსი აქვს. მსგავსი მოლოდინი აქვს Football Rankings-საც, რომელიც ქართველების B ლიგაში დარჩენის ალბათობას 70%-ით აფასებს.
მომავალ მეტოქესთან დაკავშირებით ეროვნული გუნდის თავკაცმა, რამაზ სვანაძემ აღნიშნა, რომ თანამედროვე ფეხბურთში ყველა მოწინააღმდეგე დასაფასებელია. მისი თქმით, გადამწყვეტი მნიშვნელობა არ ჰქონდა ვინ შეხვდებოდათ, რადგან მთავარი მიზანი B ლიგაში თამაშის გაგრძელებაა. ამისთვის კი აუცილებელია, რომ გუნდი მარტის რთულ შეხვედრებს იდეალურ ფორმაში და მაქსიმალურად მომზადებული შეხვდეს.