ლონდონის არსენალი მადრიდის რეალის გარემარბის, ვინისიუს ჟუნიორის ტრანსფერზე მუშაობას განაგრძობს.
The Athletic-ის ინფორმაციით, ინგლისური კლუბის მფლობელებმა მოსალოდნელი გარიგების ფინანსური პარამეტრები უკვე დაამტკიცეს. 26 წლის ბრაზილიელი არტეტასთვის შეტევის გაძლიერების პრიორიტეტული სამიზნეა, ხოლო სპორტული დირექტორი ანდრეა ბერტა ფეხბურთელის წარმომადგენლებს უკვე დაუკავშირდა.
„თუ ის კონტრაქტს არ გაახანგრძლივებს, ჩვენ მზად ვიქნებით“, – აცხადებს არტეტას პოზიციასთან დაახლოებული წყარო.
არსენალში მზად არიან ბრაზილიელის გამო მოქმედი სახელფასო სტრუქტურიდან გამონაკლისი დაუშვან. შეთავაზების დამატებითი ელემენტები შესაძლოა სოლიდური საბონუსე თანხა და საიმიჯო უფლებებიდან მისაღები შემოსავლები გახდეს.
ვინისიუსს რეალთან მოქმედი კონტრაქტი 2027 წლის ზაფხულამდე აკავშირებს, ხოლო გახანგრძლივებაზე მოლაპარაკებები ჯერჯერობით შეთანხმებით არ დასრულებულა. ლონდონელები იმედოვნებენ, რომ შექმნილი სიტუაციით ისარგებლებენ და სატრანსფერო ღირებულების შემცირებას მიაღწევენ.
როგორც იწერება, თავად ვინისიუსი მზადაა არსენალში გადასვლის ვარიანტი განიხილოს, თუ მადრიდულ კლუბთან შეთანხმებას ვერ მიაღწევს. თუმცა, უახლოეს მომავალში მხარეები ახალ კონტრაქტზე მოლაპარაკებების მორიგ რაუნდს გამართავენ.
