ცნობილია, რა უშლის ხელს ვინისიუსისა და რეალის შეთანხმებას

გაირკვა მთავარი ფაქტორი, რომელიც ვინისიუს ჟუნიორსა და მადრიდის რეალს შორის ახალი კონტრაქტის გაფორმებას აფერხებს.

ბრაზილიელი გარემარბის მოქმედი ხელშეკრულება კლუბთან 2027 წლის ივნისამდეა ძალაში, ხოლო მისი ხელფასი სეზონში დაახლოებით 18 მილიონ ევროს შეადგენს. 2025 წელს მადრიდელებმა ფეხბურთელს ახალი პირობები (20 მლნ ევრო სეზონში) შესთავაზეს, რაზეც უარი მიიღეს. ფეხბურთელის მხარის საპასუხო წინადადება კი თავად კლუბმა უარყო.

მხარეებს შორის შეთანხმება დღემდე არ მიღწეულა.

The Athletic-ის ინფორმაციით, უთანხმოების მთავარი მიზეზი ისაა, რომ ბრაზილიელი ახალი კონტრაქტის გაფორმებაში ბონუსს ითხოვს.  ფეხბურთელთან დაახლოებული წყაროები აცხადებენ, რომ ამ ბონუსს ბრაზილიელის შემოსავლის გაზრდის ერთადერთ გზად განიხილავენ, რადგან რეალი კლუბში დაწესებული სახელფასო ჭერის აწევას არ აპირებს.

ვინისიუსის მხარე კილიან მბაპეს მაგალითზე მიუთითებს, რომელიც დაახლოებით იმავე ხელფასს იღებს, თუმცა პსჟ-იდან გადასვლისას სოლიდური საბონუსე თანხა დაისაკუთრა – ეს თანხა ბევრად აღემატება იმას, რასაც რეალი ვინისიუსს სთავაზობს.

მადრიდში თვლიან, რომ ფეხბურთელის მოთხოვნის დაკმაყოფილება გუნდში საშიშ „დომინოს ეფექტს“ შექმნის მომავალი კონტრაქტების გახანგრძლივებისას. გარდა ამისა, რეალში მიიჩნევენ, რომ მბაპეს შემთხვევა განსხვავებულია, რადგნა მან ბონუსი არა კონტრაქტის გახანგრძლივებაში, არამედ კლუბში უფასოდ გადმოსვლაში მიიღო.

თუმცა, აღნიშნავენ, რომ თავად ვინისიუსი მზადაა მოთხოვნები შეამციროს, თუ ეს ახალი შეთანხმების მიღწევაში დაეხმარებათ.