ბენფიკას ფორვარდი, ჯანლუკა პრესტიანი, ვინისიუს ჟუნიორის ქცევითა და მის მიმართ წაყენებული ბრალდებებით უკმაყოფილოა.
ჩემპიონთა ლიგის მერვედფინალის პირველ მატჩში მომხდარი ინციდენტი, სადაც რეალმა 1:0 გაიმარჯვა, ახალ ფაზაში გადავიდა.
შეგახსენებთ, რომ შეხვედრა მას შემდეგ შეწყდა, რაც ვინისიუსმა არბიტრ ფრანსუა ლეტესიეს აცნობა, რომ პრესტიანიმ მას „მაიმუნი“ უწოდა. უეფამ მომხდარზე გამოძიება უკვე დაიწყო.
Record-ის ინფორმაციით, კვირის ვარჯიშის წინ პრესტიანიმ თანაგუნდელებს ბოდიში მოუხადა იმ პრობლემების გამო, რაც ამ სკანდალმა კლუბს შეუქმნა. თუმცა, არგენტინელი რასიზმს კვლავ კატეგორიულად უარყოფს.
პრესტიანი მიიჩნევს, რომ ვინისიუსის ბრალდებებმა მას პროფესიული და სოციალური თვალსაზრისით დიდი ზიანი მიაყენა. ფეხბურთელი აცხადებს, რომ თავად არის შეურაცხყოფილი ბრაზილიელის ქცევით, რადგან ცრუ ბრალდების მსხვერპლი გახდა.
საპასუხო მატჩი რეალი — ბენფიკა ოთხშაბათს, 25 თებერვალს გაიმართება.
