ვის დაუკავშირდა მიკელ არტეტა მადრიდში?

არსენალი მადრიდის რეალის ვარსკვლავის, ვინისიუს ჟუნიორის დასამატებლად ძალისხმევას აძლიერებს.

ესპანური გამოცემა AS-ის ცნობით, ინგლისური კლუბის მთავარი მწვრთნელი, მიკელ არტეტა ბრაზილიელ ფეხბურთელს უკვე დაუკავშირდა და დაარწმუნა, რომ ის არსენალის მთავარი სამიზნეა, ტრანსფერის შემთხვევაში კი, ლონდონური პროექტი მის გარშემო აშენდება.

მსოფლიო საკლუბო ჩემპიონატის შემდეგ მადრიდში დაბრუნებული ვინისიუსი უახლოეს დღეებში გუნდის ახალ მწვრთნელთან, ჟოზე მოურინიოსთან შეხვედრასა და საკუთარ გეგმებზე საუბარს აპირებს. მადრიდის რეალი 26 წლის ფეხბურთელისგან სწრაფ გადაწყვეტილებას ითხოვს: მან ან კონტრაქტი უნდა გაახანგრძლივოს, ან ამ ზაფხულს არსენალში გადავიდეს, რადგან ესპანელებს არ სურთ, რომ 2027 წელს ბრაზილიელმა კლუბი უფასოდ დატოვოს.

უკვე წელიწად-ნახევარია, ფეხბურთელის ახალ კონტრაქტზე მოლაპარაკებები ფინანსური უთანხმოების გამო ფერხდება. 2025 წლის გაზაფხულიდან ვინისიუსის გარემოცვა წელიწადში თითქმის 30 მილიონ ევროსა და ხელმოწერის ბონუსს ითხოვს, რაზეც The Athletic-ის ცნობით, მადრიდის რეალი კატეგორიულ უარს ამბობს.

შექმნილ გაურკვევლობას კულისებში აქტიურად იყენებს არსენალი, რომელიც ბრაზილიელისთვის სარეკორდო წინადადებას ამზადებს და სურს, ის კლუბის ისტორიაში ყველაზე მაღალანაზღაურებად მოთამაშედ აქციოს. თუმცა, ტრანსფერი იაფი ნამდვილად არ დაჯდება - მიუხედავად იმისა, რომ კონტრაქტი გაისად სრულდება, მადრიდის რეალი ვინისიუსის სანაცვლოდ არანაკლებ 150 მილიონ ევროს ითხოვს.