ზიდანის გაძევებიდან პენალტების სერიამდე: მატერაციმ Vivo Azzurro TV-სთან ბერლინის ფინალის საიდუმლოებები გაამხილა.
მარკო მატერაციმ Vivo Azzurro TV-სთან ინტერვიუში 2006 წლის ლეგენდარული ფინალი გაიხსენა. მან ისაუბრა იმ ემოციებზე, რაც მსოფლიო ჩემპიონატის მოგებას, ფინალში გატანილ გოლსა და გადამწყვეტ პენალტებს ახლავს. მატერაცი იხსენებს, რომ პენალტების სერიის წინ ბევრს ნერვებმა უმტყუნა:
რინო გატუზომ ბუცები გაიხადა, იაკვინტა სადღაც შორს დადიოდა, კანავარომ კი თქვა, მეექვსეს დავარტყამო. მე ყოველთვის ვარტყამდი პენალტებს და საკუთარ თავში დარწმუნებული ვიყავი
გატუზო და ზიდანი
ყველაზე საინტერესო დეტალი ზინედინ ზიდანის გაძევებას ეხება. მატერაცის თქმით, ეს ყველაფერი გატუზოს საყვედურით დაიწყო. როდესაც ბუფონმა ზიდანის თავური დარტყმა მოიგერია, გატუზო მატერაცის ეჩხუბა, რატომ არ მეურვეობო.
სწორედ ამის შემდეგ, მომდევნო ეპიზოდში, ზიდანს მაისურზე ოდნავ მოვქაჩე, რომ არ ამხტარიყო. ორჯერ ბოდიში მოვუხადე, მაგრამ მესამედ, როცა მითხრა, თუ ჩემი მაისური გინდა, მერე მოგცემო, რაღაც ვუთხარი... არაფერი იმაზე მეტი, რასაც ბავშვობაში ბარიში, ქუჩაში თამაშისას ვეტყოდით ხოლმე ერთმანეთს.
მატერაციმ გოლები დედას და ოჯახს მიუძღვნა და აღნიშნა, რომ ჩეხეთთან გატანილი გოლი უფრო მნიშვნელოვანიც კი იყო, რადგან ამით ნაკრებმა ბრაზილიასთან შეხვედრა აირიდა.
გატუზოს ხელში
იტალიის ნაკრები 2006 წლის შემდეგ ჯგუფური ეტაპის გადალახვას ვერ ახერხებს, ბოლო ორი მუნდიალი კი საერთოდ გამოტოვა. ახლა გუნდს პლეი-ოფში სწორედ ჯენარო გატუზო უხელმძღვანელებს.
ერთი რამ ვიცი: რინო ტყავს გააძრობს ყველას, რომ მსოფლიო ჩემპიონატზე წავიდეთ. მან ყველაზე რთული როლი აიღო საკუთარ თავზე. ის ცდილობს გუნდს თავისი ენთუზიაზმი გადასცეს. დარწმუნებული ვარ, მაქსიმალური პროფესიონალიზმით მუშაობს, რომ ამ ორ გადამწყვეტ მატჩს მომზადებულები შევხვდეთ.
