ეროვნული ლიგის 27-ე ტურის მთავარ მატჩში, დინამო თბილისმა ჩემპიონატის ლიდერი გორის დილა 2:0 დაამარცხა. გოლები აბდულაიე იორომ და მათე ვაწაძემ გაიტანეს.
დინამოელები მე-10 წუთიდან 10 კაცით თამაშობდნენ - ირაკლი შენგელიამ მოედნიდან ბარნს ოსეი გააძევა.
პირველი ტაიმის დამატებულ წუთებზე, დინამოელთა კოტ დ'ივუარელმა შემტევმა, აბდულაიე იორომ შორი მანძილიდან ულამაზესი გოლი შეაგდო და კაცნაკლული თანაგუნდელები დააწინაურა.
18 წლის მოთამაშემ დინამოს რიგებში სადებიუტო გოლი გაიტანა - ის თურქული ბაშაქშეჰირიდან 2026 წლის ივნისამდე აიყვანეს იჯარით.
მეორე ნახევრის დამატებულ მე-8 წუთზე, კონტრშეტევის შედეგად, მათე ვაწაძემ შეაგდო და საბოლოო ანგარიში დააფიქსირა.
დინამოელებმა ბოლო 6 მატჩიდან მე-2 შეხვედრა მოიგეს, რითაც, თავის მხრივ, გორელებს 6-მატჩიანი მოგებათა სერია შეაწყვეტინეს (5 ჩემპიონატში და 1 თასზე).
თბილისელებს გორული კლუბი ბოლო 7 ურთიერთშეხვედრაში 2-ჯერ ჰყავთ დამარცხებული - 2 ფრე და 3 წაგება. უშუალოდ დედაქალაქში დილას 2023 წლის აპრილის შემდეგ, 5 მატჩია არ მოუგია - 2 ფრე და 3 წაგება.
შედეგად, ჩემპიონატის ლიდერ დილასა და იბერია 1999-ს შორის ქულათა სხვაობა 3-მდე შემცირდა - იბერიელებმა გაგრას, სილაგაძის დუბლითა და აგიაკვას გოლით, 3:1 მოუგეს. დინამომ კი 45 ქულა მოაგროვა, მე-3 ადგილზეა და ტორპედოსთან 2-ქულიანი უპირატესობა აქვს.
დინამო თბილისი მომდევნო ტურში, 18 ოქტომბერს, დინამო ბათუმს უმასპინძლებს, ხოლო დილა ბოლოსწინა, მე-9 ადგილზე მყოფ საგარეჯოს გარეჯს ესტუმრება.
