მსოფლიო საფეხბურთო ჩემპიონატს მრავალი საკუთარი რეკორდი აქვს, რომელიც როგორც წესი, ჩემპიონატიდან ჩემპიონატამდე იხსნება. წლევანდელ მუნდიალზე რამდენიმე ასეთი უკვე ავტომატურად ცნობილია და ასევეა შანსი, რამდენიმე მიღწევა განმეორდეს ანდა გაუმჯობესდეს.
გთავაზობთ 10 რეკორდს, რომელთა გამეორება ანდა გაუმჯობესება მექსიკა-აშშ-კანადის სტადიონებზე შეგვიძლია, რომ ვიხილოთ:
1. თუ ჩემპიონი გერმანია გახდება, იგი ბრაზილიის მიღწევას გაიმეორებს და მსოფლიოს ხუთგზის ჩემპიონად მოგვევლინება.
2. თუ ჩემპიონი არგენტინა გახდება, მუნდიალის ზედიზედ მოგებით მესამე გუნდი იქნება, რომელიც ამას შეძლებს - აქამდე ორჯერ ზედიზედ იტალია (1934, 1938) და ბრაზილია (1958, 1962) გაჩემპიონდნენ.
3. თუ ჩემპიონი არგენტინა ან საფრანგეთი გახდება, ლიონელ სკალონი ან დიდიე დეშანი იტალიელ ვიტორიო პოცოს რეკორდს გაიმეორებს და მწვრთნელის რანგში მეორედ გახდება მსოფლიო ჩემპიონი.
4. თუ უზბეკეთი გაჩემპიონდება, რაც ჰიპერფანტასტიკის სფეროა, მისი მწვრთნელი ფაბიო კანავარო მეოთხე ადამიანი გახდება, რომელსაც მსოფლიო ჩემპიონატი მოგებული ექნება როგორც ფეხბურთელს და ასევე როგორც - მწვრთნელს. ეს კი ჯერ-ჯერობით მხოლოდ სამმა ადამიანმა, მარიო ზაგალომ, ფრანც ბეკენბაუერმა და დიდიე დეშანმა მოახერხეს.
5. თუ ლიონელ მესი და კილიან მბაპე, შესაბამისად, 3 და 4 გოლს გაიტანენ, მუნდიალების ისტორიაში ყველაზე მეტი ჯამური გოლის ავტორის, მიროსლავ კლოზეს მიღწევას (16 გოლი) გაიმეორებენ, უფრო მეტის გატანის შემთხვევაში კი რეკორდს გააუმჯობესებენ.
6. თუ 43 წლის მეკარე კრეიგ გორდონი გოლს გაიტანს, რაც ძნელი წარმოსადგენია, მუნდიალების ისტორიაში ყველაზე ასაკოვანი მეგოლე გახდება. ეს რეკორდი როჟე მილას ეკუთვნის, რომელმაც 42 წლისა და 39 დღისამ გამოიჩინა თავი.
7. მანუელ ნოიერს მსოფლიო ჩემპიონატებზე 7 მატჩი აქვს ჩატარებული, სადაც გოლი არ გაუშვია. რეკორდი კი 10 მატჩია, რომელიც პიტერ შილტონსა და ფაბიან ბარტეზს ეკუთვნით, ამრიგად ვეტერან გერმანელ მეკარეს წელს ამ მიღწევის გაუმჯობესების შესანიშნავი შანსი აქვს.
8. მუნდიალებზე პენალტების სერიაში ყველაზე მეტჯერ - ექვსჯერ არგენტინას აქვს მოგებული, მის შემდეგ კი ოთხ-ოთხი მოგებებით გერმანია და ხორვატია მოდიან. წლევანდელ ჩემპიონატზე მეტი რაოდენობის პლეი-ოფი კი ამ მაჩვენებლის გაუმჯობესების შანსსაც იძლევა.
9. მუნდიალებზე ყველაზე მეტჯერ - შვიდჯერ ერთმანეთს ორი გუნდი შეხვედრია: ბრაზილია-შვედეთი და გერმანია-არგენტინა (თუ არ ჩავთვლი გერმანიისა და იუგოსლავიის, შემდგომში სერბეთი & მონტენეგროსა და სერბეთის მატჩებს). არსებობს იმის შესაძლებლობა, რომ რომელიმე წყვილის შეხვედრა წელს ისევ შედგეს, რითაც ეს რეკორდიც გაუმჯობესდება.
10. ერთ მსოფლიო ჩემპიონატზე ყველაზე მეტი გოლი (172) წინა მუნდიალზე გავიდა. ცხადია, ეს რეკორდი წელს აუცილებლად გაუმჯობესდება, თუმცა საინტერესოა, შეფარდებით როგორ დაჯდება მატჩებში გასული გოლების რიცხვი ამერიკაში, რადგან ყატარში გამართულ 64 შეხვედრაში საშუალოდ 2.69 გოლი გადიოდა, წელს კი წინ 104 მატჩი გველოდება.
