ფიფას პრეზიდენტი ჯანი ინფანტინო უდიდესი სკანდალის ცენტრშია.
სავარძლის შესანარჩუნებლად და თანამდებობიდან გადადგომის თავიდან ასაცილებლად, მან მაროკოს 2030 წლის მსოფლიო ჩემპიონატის ფინალის მასპინძლობა აღუთქვა, თუკი ეს ქვეყანა მას საჯარო მხარდაჭერას გამოუცხადებს. გავრცელებული ცნობებით, ინფანტინო რაბატში კრიზისულ შეხვედრებს მართავს და მზადაა, ფინალი მადრიდში მდებარე სანტიაგო ბერნაბეუს ნაცვლად კასაბლანკაში ჩაატაროს.
ინფანტინოს წინააღმდეგ პროტესტი მას შემდეგ გამწვავდა, რაც ჩემპიონატის წილების კერძო ინვესტორებზე გაყიდვის გეგმა ჩაეშალა. ფიფას პრეზიდენტს მკაცრად დაესხა თავს ლუიშ ფიგუ, რომელმაც მას თაღლითი უწოდა და დაუყოვნებლივ გადადგომა მოსთხოვა. პარალელურად, ფიფას გლობალური ფეხბურთის განვითარების ხელმძღვანელმა არსენ ვენგერმა განაცხადა, რომ ამ სკანდალურ კომერციულ გეგმასთან საერთო არაფერი ჰქონია.
ახლა ინფანტინოს მომავალი ბეწვზე კიდია და უეფასგან შესაძლოა უნდობლობის ვოტუმიც მიიღოს. მიიღებს თუ არა მაროკო ამ სკანდალურ შეთავაზებას, ჯერჯერობით უცნობია, თუმცა ფიფას შიგნით ვითარება უკიდურესად დაძაბულია.
