თბილისური კლუბების, სპაერისა და იბერია 1999-ის გზები ოფიციალურ ტურნირებზე სულ 4-ჯერ გადაიკვეთა, თუმცა ამ მცირე დროშიც წყვილმა საკმაოდ საინტერესო ისტორია დააგროვა. სამი შეხვედრა კრისტალბეთ ეროვნულ ლიგაში შედგა, ერთი კი საქართველოს თასზე.
გთავაზობთ 3 გამორჩეულ ფაქტს თბილისური დაპირისპირების შესახებ
იბერია 1999-ის დაუმარცხებელი სერია
ამ დრომდე გამართული ოთხივე ოფიციალური მატჩიდან სამში გამარჯვება იბერია 1999-ს დარჩა, ერთი შეხვედრა კი ფრედ დასრულდა. სპაერისთვის ეს მეტოქე ჯერჯერობით გადაულახავ ბარიერად რჩება, მათ ოფიციალურ დონეზე იბერია 1999-ის დამარცხება ვერცერთხელ მოახერხეს.
ისტორია თასზე, საბურთალოს სახელით დაიწყო
გუნდების პირველი დაპირისპირება 2021 წლის 20 აპრილით თარიღდება. დავით ყიფიანის სახელობის საქართველოს თასის 1/16 ფინალში გამართულ მატჩში, იბერია 1999 ჯერ კიდევ საბურთალოს სახელით ასპარეზობდა და სტუმრად მინიმალური ანგარიშით (1:0) გაიმარჯვა.
დაბალშედეგიანი და დაძაბული მატჩები
ამ გუნდების თამაშში გოლების წვიმას ნამდვილად არ უნდა ელოდოთ. ოთხივე შეხვედრაში ჯამში მხოლოდ 6 გოლია გასული, რაც ერთ მატჩში საშუალოდ 1.5 გოლს უდრის. სტატისტიკა კიდევ უფრო საინტერესოა იმ კუთხით, რომ არცერთ დაპირისპირებაში 2 ბურთზე მეტი არ დაფიქსირებულა (0:1, 0:2, 1:1, 1:0).
თუმცა, უნდა აღინიშნოს, რომ იბერია განსაკუთრებულ ფორმაშია და, ვინ იცის, შეიძლება მათი მხრიდან გატანილი არაერთი გოლი ვიხილოთ.
