თორნიკე შენგელიამ ევროლიგაში კიდევ ერთი ისტორიული მიღწევა დააფიქსირა.
დუბაის ქართველმა კალათბურთელმა ანადოლუ ეფესი“ წინააღმდეგ გამართულ შეხვედრაში ევროლიგის კარიერაში 4000-ქულიანი ზღვარი გადალახა და ტურნირის ისტორიაში მხოლოდ მე-9 მოთამაშე გახდა, რომელმაც ამ შედეგს მიაღწია.
შენგელიას მატჩის დაწყებამდე ევროლიგაში 3992 ქულა ჰქონდა დაგროვებული და ისტორიული ნიშნულის მისაღწევად კიდევ 8 ქულა სჭირდებოდა.
ქართველმა ფორვარდმა შეხვედრა 9 ქულითა და 4 მოხსნით დაასრულა, ხოლო დუბაიმ ანადოლუ ეფესი ანგარიშით 80:75 დაამარცხა.
საქართველოს ნაკრების კაპიტანს ევროლიგაში ჩატარებულ 328 შეხვედრაში 4001 ქულა აქვს დაგროვებული. შენგელია ტურნირზე უკვე 14 სეზონია ასპარეზობს და ამ პერიოდში ცსკა-ს, დუბაის, ბარსელონას, ბასკონიას, სპირუ შარლერუასა და ვირტუს ბოლონიას ღირსებას იცავდა.
ამ მიღწევით შენგელია იმ 9 კალათბურთელს შორის მოხვდა, რომლებმაც ევროპის ყველაზე პრესტიჟულ საკლუბო საკალათბურთო ტურნირზე 4000-ქულიანი ზღვარი გადალახეს.
ევროლიგის ყველა დროის საუკეთესო მექულეთა სიას მაიკ ჯეიმსი 5783 ქულით ლიდერობს. მე-2 ადგილზე ნანდო დე კოლოა (5180), ხოლო სამეულს ნიკოლა მიროტიჩი (4487) ასრულებს.
1. მაიკ ჯეიმსი - 349 მატჩი, 12 სეზონი, 5783 ქულა
2. ნანდო დე კოლო - 356 მატჩი, 13 სეზონი, 5180 ქულა
3. ნიკოლა მიროტიჩი - 314 მატჩი, 13 სეზონი, 4487 ქულა
4. ვასილის სპანულისი - 358 მატჩი, 15 სეზონი, 4455 ქულა
5. კოსტას სლუკასი - 466 მატჩი, 17 სეზონი, 4419 ქულა
6. იან ვესელი - 413 მატჩი, 15 სეზონი, 4365 ქულა
7. სერხიო ლული - 489 მატჩი, 20 სეზონი, 4355 ქულა
8. ხუან კარლოს ნავარო - 349 მატჩი, 17 სეზონი, 4260 ქულა
9. თორნიკე შენგელია - 328 მატჩი, 14 სეზონი, 4001 ქულა