იტალიური ფეხბურთი უმძიმესი სკანდალის ეპიცენტრშია.
გამოძიების ფარგლებში ცნობილი გახდა, რომ სერია A-ს 50-მდე მოთამაშე, მათ შორის მილანისა და ინტერის ვარსკვლავები, ჩართულნი იყვნენ ფუფუნების საგნებითა და ესკორტ-სერვისით გაჯერებულ ფარულ წვეულებებში. საქმეში ფიგურირებს არამხოლოდ პროსტიტუციის ხელშეწყობა, არამედ აკრძალული ნივთიერებების გამოყენებაც.
„მუშაობა ლოკდაუნის დროსაც არ შეგვიწყვეტია“
გამოძიებამ დაადგინა, რომ დანაშაულებრივი დაჯგუფება, რომელიც მოდური ივენთ-სააგენტოს საფარქვეშ მოქმედებდა, წვეულებებს პანდემიის ყველაზე მკაცრი შეზღუდვების დროსაც კი მართავდა. ერთ-ერთი მოწმის ჩვენებით, მილანის მახლობლად მდებარე სააგენტოს შენობაში მოწყობილი იყო არალეგალური ღამის კლუბი, სადაც ფეხბურთელები, ბიზნესმენები და ფორმულა 1-ის პილოტიც კი ხშირი სტუმრები იყვნენ.
ორგანიზატორები, ემანუელე ბუტინი და დებორა რონკი, გოგონების მომსახურების საფასურიდან 50%-ს თავად იტოვებდნენ. სერვისი მოიცავდა როგორც მილანის პრესტიჟულ სასტუმროებს, ისე კერძო მოგზაურობებს მიკონოსზე.
ორსულობა და „მხიარული გაზი“
საქმის მასალებში განსაკუთრებული ყურადღება მიიპყრო რამდენიმე შოკისმომგვრელმა დეტალმა:
მოულოდნელი ორსულობა: 2025 წლის დეკემბრით დათარიღებული მიმოწერით დასტურდება, რომ ერთ-ერთი გოგონა ცნობილი ფეხბურთელისგან დაორსულდა.
გასართობი გაზი: წვეულებებზე აქტიურად გამოიყენებოდა ე.წ. „ბუშტის ნარკოტიკი“. ეს ნივთიერება ეიფორიას იწვევს, თუმცა დოპინგ-ტესტზე არ ჩანს, რაც სპორტსმენებისთვის მას განსაკუთრებულად მიმზიდველს ხდიდა.
ვარსკვლავების ფარული ცხოვრება
მიუხედავად იმისა, რომ სასამართლომ კლიენტების სახელები ამ ეტაპზე გაასაიდუმლოა, სატელეფონო ამონაწერები მოწმობს მჭიდრო კავშირებს სერია A-ს მოთამაშეებთან. ერთ-ერთ ეპიზოდში ფიქსირდება რვა განხორციელებული ზარი ცნობილ ფეხბურთელთან. კლიენტებს შორის, ფეხბურთელების გარდა, ჰოკეისტები და მაღალი წრის წარმომადგენლებიც იყვნენ.
ამჟამად საქმის მთავარი ფიგურანტები შინაპატიმრობაში იმყოფებიან, იტალიური მედია კი მოლოდინშია, გასკდება თუ არა ვარსკვლავების სახელები, რაც შესაძლოა ბევრი მათგანის კარიერისთვის საბედისწერო აღმოჩნდეს.
