2026 წელი Major League Soccer-ისთვის (MLS) ნამდვილად გამორჩეული და რეკორდული აღმოჩნდა.
ლიგის ოფიციალური მონაცემებით, ყოველკვირეული ცოცხალი ტრანსლაციების მნახველთა რაოდენობა წინა სეზონთან შედარებით 93%-ით გაიზარდა და საშუალოდ 7.2 მილიონი შეადგინა. ეს შთამბეჭდავი ციფრი აერთიანებს მაყურებლებს როგორც სტრიმინგ პლატფორმებიდან (მათ შორის Apple TV-დან), ისე ამერიკული, კანადური და საერთაშორისო ტელევიზიებიდან.
ზრდა განსაკუთრებით შესამჩნევია ახალგაზრდა აუდიტორიაში, რასაც დიდწილად მსოფლიო ჩემპიონატის ეფექტით ხსნიან. ტურნირის შემდეგ, FOX-სა და FS1-ზე 18-34 წლის ასაკის მამაკაცებში ტრანსლაციების ყურებადობა 45%-ით გაიზარდა. საინტერესოა, რომ MLS-ის გულშემატკივრების საშუალო ასაკი 39.6 წელია, რაც ამერიკულ პროფესიულ ლიგებს შორის ყველაზე ახალგაზრდა მაჩვენებელია.
შთამბეჭდავია სტადიონებზე დასწრების სტატისტიკაც - რეგულარული სეზონის მატჩებს 11.2 მილიონზე მეტი გულშემატკივარი დაესწრო (საშუალოდ 22,063 ადამიანი თამაშზე), რაც ლიგის ისტორიაში მეორე საუკეთესო მაჩვენებელია. ექვსმა კლუბმა კი ერთ მატჩზე დასწრების ინდივიდუალური რეკორდი დაამყარა. რაც შეეხება ციფრულ სამყაროს, აქ MLS-მა ნამდვილი ბუმი მოახდინა. ლიგამ და კლუბებმა ერთად სოციალურ ქსელებში 19.1 მილიარდი შთაბეჭდილება (18%-იანი ზრდა) და 838 მილიონი ჩართულობა (13%-იანი ზრდა) დააფიქსირეს. ვიდეოების ნახვებმა 5.8 მილიარდს მიაღწია, ხოლო ლიგისა და კლუბების საერთო გამომწერთა რაოდენობამ 123.5 მილიონი შეადგინა. ლიგაში მოელიან, რომ თუ პლეი-ოფებშიც მსგავსი ტენდენცია შენარჩუნდება, MLS დასწრების მხრივ მსოფლიოს ტოპ სამ საფეხბურთო ლიგაში შევა.
