უეფას სუპერთასის მატჩის შემდეგ, ცნობილი გამოცემა The Athletic ხვიჩა კვარაცხელიაზე წერს.
,,ლიონელ მესიმ, ერლინგ ჰალანდმა და კილიან მბაპემ თავი შესანიშნავად წარმოაჩინეს, თუმცა აკლდა თუ არა 2026 წლის მსოფლიო ჩემპიონატს ფეხბურთის ყველაზე ნიჭიერი ვარსკვლავი, ხვიჩა კვარაცხელია?
საქართველოს ნაკრები მსოფლიო ჩემპიონატზე არასდროს გასულა, რის გამოც კვარაცხელიას უდიდეს საფეხბურთო სცენამდე მისასვლელად გაცილებით რთული გზა აქვს.
ასტონ ვილასთან მატჩში კი მან ყველას შთამბეჭდავად შეახსენა, თუ რა დააკლდა ჩრდილოეთ ამერიკაში გამართულ მუნდიალს.
ჩაწეული წინდები, საოცრად დაბალანსებული დრიბლინგი, ბურთზე ულამაზესი დარტყმა, ესთეტიკური თვალსაზრისით, როდესაც კვარაცხელია თავის საუკეთესო ფეხბურთს თამაშობს, მასზე სანახაობრივი მოთამაშე ბევრი არ არის.
თუმცა ამ ელეგანტურობის მიღმა ცივსისხლიანი დაუნდობლობაც იმალება, რაც მისმა გამანადგურებელმა პირველმა გოლმა ნათლად დაგვანახა.
კვარაცხელიას საოცარი უნარი აქვს, წარმოუდგენელი სისწრაფით დრიბლინგის დროსაც კი ბურთს ფეხიდან თითქმის არ იშორებს. სწორედ ეს თვისება აძლევს მას გადამწყვეტ, წამის მეასედებით უპირატესობას.
ქართველის მოულოდნელ მოძრაობაზე ვილას მეკარე მარკოს ბიზოტმა კარის გასწვრივ გადაადგილება დაიწყო, თუმცა პოზიციის დაკავებაც ვერ მოასწრო, როდესაც კვარაცხელიამ ახლო კუთხეში უძლიერესი დარტყმით ბურთი გაიტანა.
ამასთან, ქართველი მხოლოდ შეტევაზე ორიენტირებული ფეხბურთელი არ არის. ის ბურთის გარეშე თამაშის დროსაც დაუღალავად მუშაობს, ვილას მცველებზე მუდმივად ზეწოლას ახორციელებს და პსჟ-ის ინტენსიური კონტრპრესინგის ერთ-ერთი მნიშვნელოვანი რგოლია.
საფრანგეთის ჩემპიონატში ნაჩვენები შედეგები, ალბათ, მას ოქროს ბურთისთვის რეალური ბრძოლის საშუალებას არ აძლევს, გასულ სეზონში ლიგა 1-ში მან მხოლოდ 8 გოლი გაიტანა.
სამაგიეროდ, კვარაცხელია თავის საუკეთესო თამაშს დიდი მატჩებისთვის ინახავს და ევროტურნირებზე ნამდვილ შემოქმედებით მონსტრად გარდაიქმნება.
ფეხბურთის სხვა სუპერვარსკვლავებთან შედარებით, მას ზაფხულში დასვენების შესაძლებლობაც ჰქონდა, ამიტომ მისგან კიდევ ერთ შთამბეჭდავ სეზონს უნდა ველოდოთ." - წერია სტატიაში.
,,მას ეს შეუძლია" - რა თქვა უნაი ემერიმ კვარაცხელიაზე?
