ბოლო საათებში ფორმულა 1-ის გუნდ ალპინში მნიშვნელოვანი ცვლილებები დადასტურდა.
ფრანგული გუნდის ოფიციალური განცხადებით, გუნდის ხელმძღვანელი აღარ იქნება ოლივერ ოუკსი და მის როლს ფლავიო ბრიატორე შეითავსებს, რომელიც ალპინის აღმასრულებელი მრჩეველია.
ცოტა ხნის წინ ფრანგებმა ასევე დაადასტურეს, რომ ფრანკო კოლაპინტო ჯეკ დუჰანს მომდევნო 5 რბოლის განმავლობაში ჩაანაცვლებს. არგენტინელის დებიუტი ახალ გუნდში ემილია-რომანიას გრან პრიზე შედგება და ის პიერ გასლის თანაგუნდელი იქნება.
ჯეკ დუჰანი რომ ალპინის მრბოლელი იქნებოდა, გასული წლის ზაფხულში დადატურდა და 22 წლის პილოტს შანსი ჯერ კიდევ წინა სეზონის ბოლო რბოლაში, აბუ დაბიში მიეცა, როცა მან ჰაასში მიმავალი ესტებან ოკონი ჩაანაცვლა.
ამ სეზონში 22 წლის მრბოლელს გაუჭირდა ალპინში ასპარეზობა, რაც იმაში გამოიხატებოდა, რომ ის თანაგუნდელ გასლის მხარს ვერ უბამდა, ბოლო რბოლაში, მაიამიში კი მას პირველ წრეზე ლიამ ლოუსონთან შეჯახების შემდეგ ასპარეზობის ნაადრევად დასრულება მოუწია.
დუჰანის ადგილს კოლაპინტო დაიკავებს, რომელიც ამ სეზონში ალპინის სარეზერვო მრბოლელი იყო, მან გასულ სეზონში უილიამსის შემადგენლობაში 9 რბოლა ჩაატარა და საკმაოდ შთამბეჭდავიც იყო.
