"ამ თამაშზე ყოველდღე ვფიქრობდი" - შერმადინის კომენტარი ბოლო საშინაო სანაკრებო მატჩის შემდეგ

გიორგი შერმადინმა, 19-წლიანი სანაკრებო კარიერის ბოლო საშინაო მატჩის შემდეგ, მედიასთან კომენტარი გააკეთა:

"ქართველი გულშემატკივრის წინაშე ბოლო სანაკრებო თამაში ჩავატარე. ამ მაისურით კიდევ ერთი შეხვედრა, ესპანეთის წინააღმდეგ, მელოდება იქ, სადაც უკვე 6 წელია ვთამაშობ. ვეცდებით, რომ ამ მსოფლიოს შესარჩევზე პირველი გამარჯვება იქ მოვიპოვოთ.

უშუალოდ ამ მატჩის შედეგიდან გამომდინარე, რთულია გახარებული ვიყო, მაგრამ მიხარია ის, რომ დარბაზში ასეთი ატმოსფერო იყო და ვამაყობ იმ სიყვარულით, რასაც თითოეული თქვენგანისგან ვგრძნობ. ბოლო დღეების განმავლობაში უამრავი მესიჯი მივიღე.

ამ შეხვედრაზე ყოველდღიურად ვფიქრობდი და მინდოდა, გამარჯვებული წავსულიყავი, მაგრამ ასე არ გამოვიდა, ეს სპორტია, რომელშიც ხან იგებ და ხან აგებ.

ყველაფერ იმას, რასაც ვიწყებთ, ადრე თუ გვიან, დასასრული აქვს და ვგრძნობ, რომ წასვლის დროა, ნაკრებში ადგილი ახალ ბიჭებს უნდა დავუთმო. წასასვლელად სწორი და სათანადო დროა.

ჩემს თანაგუნდელებსა და იმ მოთამაშეებსაც, ვინც გუნდს შემოემატება, წარმატებებს ვუსურვებ", - განაცხადა შერმადინმა.

ბოლო საშინაო სანაკრებო მატჩისას, გიორგი შერმადინმა სიმბოლურია, რომ თამაშის პირველი ქულები აიღო და ჩვენები 2:0 დააწინაურა - ჯამში 7 ქულა, 6 მოხსნა და 3 ასისტი ჩაიწერა აქტივში.

მთელი შეხვედრის განმავლობაში სათამაშო მოედნის გარშემო აჭარაბეთის კამპანია ანათებდა წარწერით: "მადლობა, შერმადინი".

შერმოს დებიუტი ნაკრებში 2006 წლის 3 სექტემბერს შედგა. იგი ერთადერთი ქართველია, რომელსაც დამოუკიდებლობის შემდეგ საქართველოს ნაკრების მიერ ნათამაშებ 7-ვე დიდ ტურნირზე აქვს მონაწილეობა მიღებული - 6 ევრობასკეტი და 1 მსოფლიო ჩემპიონატი.

ლეგენდარული კალათბურთელი 19-წლიან სანაკრებო კარიერას დაასრულებს იმ ქალაქში, რომლის კლუბშიც 6 წელია თამაშობს - ტენერიფეში ესპანეთის ნაკრები 30 ნოემბერს გვიმასპინძლებს.