კიმი ანტონელიმ იაპონიის გრან-პრიზე გამარჯვება მოიპოვა.
იტალიელი გახდა ჩემპიონატის ყველაზე ახალგაზრდა ლიდერი ისტორიაში მას შემდეგ, რაც დამაჯერებელი რბოლა ჩაატარა და ზედიზედ მე-2 გამარჯვება მოიპოვა, ოსკარ პიასტრისა და შარლ ლეკლერის წინ.
როდესაც სუზუკას ტრასაზე სტარტის შუქები ჩაქრა, პიასტრიმ შესანიშნავი სტარტი აიღო და პირველ მოსახვევში ლიდერობა მოიპოვა, მაშინ როცა მერსედესის ბოლიდები ჩამორჩნენ. თუმცა, „ვერცხლისფერი ისრების“ პილოტებმა მალევე დაიწყეს დაბრუნება, ჯორჯ რასელმა პიასტრის ლიდერობისთვისაც კი შეუტია, თუმცა გადასწრება ვერ მოახერხა.
მას შემდეგ, რაც რამდენიმე პილოტმა პიტ-სტოპები შეასრულა, მათ შორის პიასტრიმ და რასელმა, ჰაასის პილოტ ოლი ბერმანის მძიმე ავარიამ 22-ე წრეზე უსაფრთხოების მანქანა გამოიწვია. ამან ანტონელის მისცა შესაძლებლობა, რომელიც ჯერ კიდევ პიტში არ იყო შესული და დროებით ლიდერობდა, პიტში შესულიყო და კვლავ პირველ პოზიციაზე დაბრუნებულიყო.
ამის შემდეგ ახალგაზრდა იტალიელმა იდეალური რესტარტი შეასრულა, შეინარჩუნა პირველი ადგილი და წინ დიდი უპირატესობა შექმნა. ფინიშის ხაზი მან პიასტრიზე 13.722 წამით ადრე გადაკვეთა, ხოლო ამ გამარჯვებამ მას მრბოლელთა ჩემპიონატის ლიდერობაც მოუტანა და ამით ისტორიაში ყველაზე ახალგაზრდა ლიდერი გახდა.
პიასტრიმ სეზონში თავისი პირველი ფინიში შთამბეჭდავად აღნიშნა, ავსტრალიელმა მაკლარენს სეზონის პირველი პოდიუმი მოუტანა მე-2 ადგილით, ხოლო ლეკლერმა რასელს გაუძლო და მე-3 ადგილი დაიკავა.
რბოლის შედეგად ქულები ასე განაწილდა:
1. კიმი ანტონელი (მერსედესი) - 25 ქულა
2. ოსკარ პიასტრი (მაკლარენი) - 18 ქულა
3. შარლ ლეკლერი (ფერარი) - 15 ქულა
4. ჯორჯ რასელი (მერსედესი) - 12 ქულა
5. ლანდო ნორისი (მაკლარენი) - 10 ქულა
6. ლუის ჰამილტონი (ფერარი) - 8 ქულა
7. პიერ გასლი (ალპინი) - 6 ქულა
8. მაქს ვერსტაპენი (რედ ბული) - 4 ქულა
9. ლიამ ლოუსონი (რეისინგ ბულსი) - 2 ქულა
10. ესტებან ოკონი (ჰაასი) - 1 ქულა
მრბოლელთა საჩემპიონო დავაში ასეთი სიტუაციაა:
1. კიმი ანტონელი - 72 ქულა
2. ჯორჯ რასელი - 63 ქულა
3. შარლ ლეკლერი - 49 ქულა
4. ლუის ჰამილტონი - 41 ქულა
5. ლანდო ნორისი - 25 ქულა
6. ოსკარ პიასტრი - 21 ქულა
7. ოლივერ ბერმანი - 17 ქულა
8. პიერ გასლი - 15 ქულა
9. მაქს ვერსტაპენი - 12 ქულა
10. ლიამ ლოუსონი - 10 ქულა
ბაჰრეინსა და საუდის არაბეთში გაუქმებული ღონისძიებების გამო, ფორმულა 1 აპრილში დაისვენებს და 1-3 მაისს მაიამის გრან-პრით დაბრუნდება.
