,,არაპროფესიონალურია" - ნორვეგიელები შოტლანდიელებს გაუბრაზდნენ

შოტლანდიის ნაკრებს „არაპროფესიონალიზმში" ადანაშაულებენ მას შემდეგ, რაც მათ მსოფლიო ჩემპიონატის წინ ნორვეგიასთან დაგეგმილი ამხანაგური შეხვედრა გააუქმეს.

ნორვეგიამ კვირას, ნიუ-ჯერსიში, მაროკოსთან ამხანაგური მატჩი 1:1 დაასრულა და ორშაბათს დახურულ კარს მიღმა შოტლანდიას უნდა შეხვედროდა, რათა იმ ფეხბურთელებს, რომლებმაც კვირის თამაშში მონაწილეობა არ მიიღეს, სათამაშო პრაქტიკა მიეღოთ.

შოტლანდიამ შაბათს ნიუ-ჯერსიში ბოლივია 4:0 დაამარცხა. ნორვეგიასთან დაგეგმილი შეხვედრის შესახებ მთავარმა მწვრთნელმა სტივ კლარკმა კვირას BBC Radio Scotland-ს უთხრა:

ეს უბრალოდ ერთსაათიანი სავარჯიშო თამაში უნდა ყოფილიყო ჩვენს ბაზაზე. გასულ კვირას რამდენიმე მცირე დაზიანება მივიღეთ და გადავწყვიტეთ, რომ რისკად არ ღირდა.

თუმცა, ბოლივიასთან გამარჯვების შემდეგ კლარკმა BBC-ს განუცხადა, რომ მისმა გუნდმა მატჩი „ტრავმების გარეშე“ დაასრულა.

ნორვეგიის ნაკრების მთავარმა მწვრთნელმა სტოლე სოლბაკენმა კი ნორვეგიულ საზოგადოებრივ მაუწყებელ NRK-ს უთხრა:

ეს ჩემთვისაც არანაკლებ მოულოდნელი იყო, შოტლანდიის საქციელი არაპროფესიონალურია.

არაპროფესიონალურია ისიც, რომ მწვრთნელს (სტივ კლარკს) პირადად არ დაურეკავს ჩემთვის. მათ გუნდის მენეჯერის მეშვეობით შეგვატყობინეს გადაწყვეტილება მას შემდეგ, რაც ვარჯიში უკვე დასრულებული გვქონდა. არ მგონია, იმ ტრავმებზე, რომლებსაც ისინი იმიზეზებენ, ბოლო ვარჯიშის შემდეგ საუბრობდნენ. ეს ასე არ არის.

იმედგაცრუებული ვარ. ეს არაპროფესიონალური საქციელია. მაგრამ ამასთან შეგუება გვიწევს. ამიტომ თამაშისთვის გარკვეული ცვლილებების შეტანა მოგვიხდა.“

ყოფილი ცენტრალური მცველი ბრედე ჰანგელანდი, რომელსაც პრემიერ ლიგაში 238 მატჩი აქვს ჩატარებული და ნორვეგიის ნაკრების მაისურით 91-ჯერ უთამაშია, 2021 წლიდან ეროვნული გუნდის სპორტული კოორდინატორია.

44 წლის ჰანგელანდმა NRK-ს განუცხადა:

ამ მატჩის ორგანიზებაზე მრავალი თვის განმავლობაში ვმუშაობდით. მისი გაუქმება რამდენიმე დღით ადრე ნამდვილად სამარცხვინოა. ამის შეცვლა აღარ შეგვიძლია, ამიტომ უნდა დავივიწყოთ და არსებული ვითარებიდან მაქსიმალური სარგებელი მივიღოთ.

დიდი სამუშაო, შეთანხმებები და ჯენტლმენური პირობა არსებობდა, შემდეგ კი მოულოდნელად მათ გადაიფიქრეს. ვფიქრობ, ეს, რბილად რომ ვთქვათ, სუსტი ნაბიჯი იყო.“

შოტლანდია, რომელიც C ჯგუფში მოხვდა, ჩრდილოეთ კაროლინის ქალაქ შარლოტშია დაბანაკებული და 1998 წლის შემდეგ პირველად მონაწილეობს მსოფლიო ჩემპიონატზე. მათ შაბათს ამხანაგურ მატჩში ბოლივია 4:0 დაამარცხეს და ტურნირს 14 ივნისს ჰაიტის წინააღმდეგ შეხვედრით დაიწყებენ.

ნორვეგია, რომელიც I ჯგუფშია განაწილებული, გრინსბოროშია განთავსებული, შოტლანდიის ბაზიდან დაახლოებით 90 მილის დაშორებით. ნორვეგიელები მსოფლიო ჩემპიონატზე ასპარეზობას 16 ივნისს ერაყის წინააღმდეგ მატჩით დაიწყებენ.