არსენალი პრემიერ ლიგის იმ კლუბებს შორისაა, რომლებიც ზაფხულის სატრანსფერო ფანჯრის წინ ატალანტას ნახევარმცველს, ედერსონს აკვირდებიან.
ჩრდილოეთ ლონდონელებმა იციან, რომ ბრაზილიელი ფეხბურთელი ამ სეზონის შემდეგ ხელმისაწვდომი იქნება. გავრცელებული ინფორმაციით, ედერსონმა პირადი კონტრაქტის დეტალები მადრიდის ატლეტიკოსთან უკვე შეათანხმა, თუმცა ესპანური მხარე არ არის მზად დააკმაყოფილოს ატალანტას მოთხოვნა, რომელიც დაახლოებით 45-50 მილიონ ევროს შეადგენს.
ედერსონის მიმართ ინტერესს მანჩესტერ იუნაიტედიც იჩენს. ბრაზილიელი, რომელსაც ხშირად „მსოფლიოს უძლიერეს საყრდენ ნახევარმცველად“ მოიხსენიებენ, პრემიერ ლიგაში გადასვლის წინააღმდეგი არ არის.
არსენალი ნახევარდაცვის გაძლიერებას იანვარშიც ცდილობდა მიკელ მერინოს სერიოზული ტრავმის შემდეგ, რომელიც მას შემდეგ მოედანზე აღარ გამოჩენილა. გასულ ზაფხულს გუნდს მარტინ ზუბიმენდი და კრისტიან ნორგორი შეუერთდნენ. ზუბიმენდი მიკელ არტეტას გუნდის საკვანძო ფიგურა გახდა და საჩემპიონო ბრძოლაში დიდი წვლილი შეაქვს, ნორგორი კი თითქმის არ თამაშობს. მან მხოლოდ 6 მატჩი ჩაატარა და ისიც შეცვლაზე.
გასულ ზაფხულს დახარჯული 250 მილიონის შემდეგ, არსენალი მორიგი აქტიური სატრანსფერო პერიოდისთვის ემზადება. გუნდი დაინტერესებულია ბრიუგეს ამომავალი ვარსკვლავით - ნიკოლო ტრეზოლდით.
21 წლის გერმანელმა თავდამსხმელმა ბელგიაში ბრწყინვალე სეზონი ჩაატარა და 52 მატჩში 18 გოლი გაიტანა. იტალიური მედიის ცნობით, არსენალის სპორტული დირექტორი ანდრეა ბერტა ბრიუგეს ხელმძღვანელობასთან მოლაპარაკებებს უკვე აწარმოებს.
