ტოტენჰემს გიორგი მიქაუტაძის ტრანსფერისთვის ბრძოლაში მთავარი კონკურენტი შესაძლოა გამოაკლდეს, თუმცა ინგლისურ კლუბს ქართველი თავდამსხმელის იანვარში დამატების გზაზე სხვა სერიოზული დაბრკოლება ელის.
ბრიტანული გამოცემა Football Insider-ის ინფორმაციით, ევერტონს მიქაუტაძის ტრანსფერის დაფინანსება უჭირს, რადგან ვილიარეალი ფეხბურთელს 33 მილიონ ფუნტ სტერლინგად აფასებს.
კლუბის მფლობელებთან დაკავშირებული გაურკვევლობის გამო, მერსისაიდელები ზამთრის სატრანსფერო ფანჯრისას ძვირადღირებული შენაძენებისგან თავს იკავებენ, რაც ტოტენჰემს კონკურენციას უმცირებს.
მიუხედავად ამისა, რობერტო დე ძერბის გუნდისთვის მთავარ პრობლემად თავად ვილიარეალის პოზიცია რჩება. ესპანური კლუბი არ ჩქარობს ქართველი ფორვარდის გაყიდვას და სეზონის შუაში, სანამ ჩემპიონთა ლიგაზე ასპარეზობას აგრძელებს, მის თაობაზე წინადადებების განხილვას არ გეგმავს.
ამასთან, განსხვავებული ცნობები ვრცელდება მოთამაშის სატრანსფერო ფასზეც. თუ Football Insider 33 მილიონ ფუნტს ასახელებს, ტოტენჰემთან დაახლოებული წყარო პოლ ოკიფი ამტკიცებს, რომ ვილიარეალი მიქაუტაძის სანაცვლოდ 80 მილიონ ფუნტზე მეტს მოითხოვს.
აღსანიშნავია, რომ მიმდინარე სეზონში გიორგი მიქაუტაძეს ყველა ტურნირზე ჩატარებულ 17 შეხვედრაში 5 გოლი და 2 საგოლე გადაცემა აქვს, რაც ტოტენჰემის ამჟამინდელი შემტევების, დომინიკ სოლანკესა (3 შედეგიანი მოქმედება 12 მატჩში) და ომარ მარმუშის (1 გოლი 11 მატჩში) მაჩვენებლებს აღემატება.