არსენალი სპორტინგის წინააღმდეგ: დროა არტეტამ გარისკოს

ოთხშაბათ ღამით არსენალი ჩემპიონთა ლიგის მეოთხედფინალის გადამწყვეტ მატჩს მასპინძლობს - ემირეითსზე სპორტინგი ჩამოდის. მიკელ არტეტა ახლა სეზონის გადასარჩენად იბრძვის.

სულ რაღაც ერთი თვის წინ მეთოფეები ოთხი ტიტულისთვის იბრძოდნენ, თუმცა მას შემდეგ კარაბაოს თასის ფინალი მანჩესტერ სიტისთან წააგეს, ინგლისის თასიდან კი ჩემპიონშიპის საუთჰემპტონმა გამოაგდო.

ლისაბონში კაი ჰავერცის გვიანმა გოლმა არსენალს 1:0 მოაგებინა, თუმცა მას შემდეგ გუნდი ბორნმუთთან (1:2) დამარცხდა, რამაც ფეხბურთელების მენტალიტეტთან დაკავშირებით სერიოზული კითხვები გააჩინა.

არსენალის შეტევა ბოლო დროს მოიკოჭლებს. თუ არტეტას მოგება სურს, მან მოედანზე ის მოთამაშეები უნდა გაიყვანოს, ვინც რეალურად ქმნის განსხვავებას და არა უბრალოდ დიდი სახელები. როცა ბუკაიო საკას თამაში სათუოა, ნონი მადუეკე ფორმაში არაა, მარტინელი კი ვერაფერს აკეთებს, არტეტა ვალდებულია ახალგაზრდა მაქს დაუმანს ენდოს.

დაუმანი სეზონის ერთ-ერთი მთავარი აღმოჩენაა. მას დებიუტი 15 წლის ასაკში ჰქონდა და მას შემდეგ არტეტას გუნდის რეგულარული წევრია. მისი უნარი, ერთი-ერთზე მოატყუოს მეტოქე, ზუსტად ისაა, რაც სპორტინგის დაცვის გასარღვევად არის საჭირო.