ჟოაუ კანსელუმ სოციალურ ქსელში გამოქვეყნებული პოსტის მიხედვით, იგი ბარსელონაში მალე დაბრუნდება.
32 წლის მცველმა ტრანსფერის მინიშნებად ქვიშის საათის ემოჯი და ბარსელონას ფორმიანი ფოტო გამოიყენა, რამაც კატალონიური კლუბის გულშემატკივრებში დიდი მღელვარება გამოიწვია.
ბარსელონა და ალ-ჰილალი ტრანსფერის საბოლოო პირობებზე აქტიურად საუბრობენ. თავდაპირველად მხარეები 10 მილიონ ევროზე შეთანხმდნენ, თუმცა მოგვიანებით საუდის არაბეთის კლუბმა მოთხოვნა 15 მილიონ ევრომდე გაზარდა.
მიუხედავად ფასის ცვლილებისა, ბარსელონაში ფიქრობენ, რომ გარიგება უახლოეს დღეებში დაიხურება. კანსელუმ ალ-ჰილალის ბოლო მატჩი გამოტოვა ალ-ფაისალის წინააღმდეგ, რაც მის მოსალოდნელ წასვლაზე კიდევ უფრო მეტად მიანიშნებს.
გარდა ამისა, საუდის არაბეთის ლიგის რეგულაციების თანახმად, კლუბს 13 ლეგიონერი ჰყავს, მაშინ როდესაც განაცხადში მხოლოდ 10 მოთამაშის დარეგისტრირების უფლება აქვთ. ალ-ჰილალის მთავარმა მწვრთნელმა, სიმონე ინძაგიმ განაცხადა, რომ პორტუგალიელი მცველი გუნდთან ერთად ჩვეულ რეჟიმში ვარჯიშობს, ხოლო მისი მომავლის საკითხი ხელმძღვანელობის გადასაწყვეტია.
ჰანსი ფლიკი კანსელუს დაბრუნების მთავარი ინიციატორია, რადგან მას ფეხბურთელის ტაქტიკური მოქნილობა და დაცვის ორივე ფლანგზე ეფექტურად თამაშის უნარი ძალიან მოსწონს.
