ბარსელონასა და რასინგ სანტანდერის მომავალ დაპირისპირებას ტაქტიკურის გარდა, სხვა სერიოზული საფრთხეც ემუქრება.
კამპ ნოუზე ოთხშაბათს ღამით დაგეგმილი შეხვედრა შესაძლოა დათქმულ დროს არ დაიწყოს, რისი მიზეზიც რეგიონში მოსალოდნელი უმძიმესი მეტეოროლოგიური პირობებია.
კატალონიური სააგენტო Meteocat-ის ცნობით, ესპანეთის ამ ნაწილს ახალი შტორმი უახლოვდება. სინოპტიკოსების პროგნოზით, მოსალოდნელია ტემპერატურის მკვეთრი ვარდნა და დიდი ოდენობით ნალექი, არასტაბილური კლიმატური ვითარება კი ხუთშაბათის დილამდე შენარჩუნდება.
კატალონიის რამდენიმე რაიონში კოკისპირული წვიმის, შტორმისა და სეტყვის საფრთხის გამო უკვე გამოცხადებულია ყვითელი განგაში. ექსპერტები ვარაუდობენ, რომ ამინდი განსაკუთრებით ბარსელონას სანაპირო ზოლსა და მის მიმდებარე ტერიტორიებზე გაუარესდება.
მსგავსი პრობლემა ბარსელონას ფეიენოორდთან გამართულ ჩემპიონთა ლიგის შეხვედრაშიც შეექმნა, როცა საწყისი 30 წუთი კოკისპირულ წვიმაში წარიმართა. ახლა კი კრიტიკული მეტეოროლოგიური ფანჯარა ზუსტად რასინგთან დაპირისპირების საათებს ემთხვევა, რაც თამაშის დროულად დაწყებას სრულად ბუნებრივ პირობებზე ხდის დამოკიდებულს.
