ინტერის ყოფილმა პრეზიდენტმა, მასიმო მორატიმ 2012 წლის სატრანსფერო ფანჯრის აქამდე უცნობი დეტალები გაასაჯაროვა.
მისი თქმით, მილანურმა კლუბმა ლიონელ მესის გადასაბირებლად იმ დროისთვის წარმოუდგენელი თანხა, 500 მილიონი ევრო გამოყო, თუმცა არგენტინელი ვარსკვლავისგან მტკიცე უარი მიიღო.
კატალონიური გამოცემა Sport-ის ინფორმაციით, მორატიმ მოლაპარაკებების საწარმოებლად ესპანეთში კლუბის ვიცე-პრეზიდენტი გაგზავნა. მიუხედავად ფინანსური ცდუნებისა, ბარსელონას ლიდერმა კონვერტი არც კი გახსნა და შეთავაზების ზუსტი მოცულობის გაგების გარეშე, ტრანსფერზე მაშინვე უარი განაცხადა.
მოგვიანებით, იტალიელ ფუნქციონერთან პირად საუბარში ფეხბურთელმა თავისი გადაწყვეტილების მთავარი მოტივი თავადვე განმარტა.
დაინტერესებას ძალიან ვაფასებ, მაგრამ ჩემი სურვილია, რომ საფეხბურთო კარიერა ბარსელონაში დავასრულო
მიუხედავად ამხელა ერთგულებისა, არგენტინელის ეს ოცნება საბოლოოდ აუსრულებელი დარჩა. 2021 წელს, ესპანური გრანდის მძიმე ფინანსური კრიზისის გამო, მესიმ საყვარელი კლუბი იძულებით დატოვა და პარი სენ-ჟერმენს შეუერთდა, ამჟამად კი კარიერას ამერიკულ ინტერ მაიამიში ასრულებს.
