ბელგიის ჩემპიონს მწვრთნელი წაართვეს - მონაკომ ჰიუტერის შემცვლელი წარადგინა

ფრანგულმა მონაკომ, ადი ჰიუტერის დათხოვნის შემდეგ, ახალი მთავარი მწვრთნელის ვინაობა გამოაცხადა. კლუბმა ოფიციალურად დაადასტურა, რომ ჰიუტერს 38 წლის სებასტიან პოკონიოლი ჩაანაცვლებს.

ახალგაზრდა სპეციალისტი ბელგიურ როიალ უნიონ სენ-ჟილში გასული სეზონის დაწყებამდე დაინიშნა და კლუბს ბელგიის სუპერ თასი და ქვეყნის ჩემპიონატი მოაგებინა - კლუბს ბელგიის ჩემპიონის ტიტული 1934-35 წლების სეზონის შემდეგ არ ჰქონდა მოგებული.

პოკონიოლის პირველი თამაში მომდევნო უქმეებზე, ანჟესთან ლიგა 1-ში გასვლითი მატჩი იქნება, ხოლო იქიდან 4 დღის შემდეგ ჩემპიონთა ლიგაზე ტოტენჰემს უმასპინძლებენ.

პოკონიოლი ახლო წარსულში საკმაოდ მაღალ დონეზე თამაშობდა - ნიდერლანდების, ბელგიის, გერმანიისა და ინგლისის მთავარ ლიგებში ასპარეზობდა. სამწვრთნელო კარიერა 2021 წელს დაიწყო და მას შემდეგ გამოცდილებად მხოლოდ ასაკობრივ გუნდებში მუშაობა და როიალ უნიონში ნახსენები 1-წლიანი პერიოდი აქვს. მან სენ-ჟილთან კონტრაქტი 2 დღის წინ, 10 ოქტომბერს გაწყვიტა.

მონაკომ ადი ჰიუტერი არადამაკმაყოფილებელი შედეგების გამო გაათავისუფლა - ბოლო 5-დან 1 მატჩი მოიგო.