ლიონელ მესიმ არგენტინის ეროვნულ ნაკრებში თავისი ლეგენდარული 20-წლიანი კარიერა ოფიციალურად დაასრულა.
ინტერ მაიამის ვარსკვლავმა გულშემატკივრებს ვრცელი და ემოციური გამოსამშვიდობებელი წერილით მიმართა, რომელშიც ნაკრებიდან წასვლის რთულ გადაწყვეტილებაზე ისაუბრა.
„ფინალის შემდეგ გასული ამ დროის განმავლობაში, ბევრი ფიქრის შემდეგ, მინდა ყველას გაცნობოთ, რომ ნაკრებიდან მივდივარ...
ეს იყო გადაწყვეტილება, რომელმაც მატკინა და ახლაც სულს მიმწარებს, მაგრამ მესმის, რომ ამის დრო მოვიდა. გეფიცებით, მოედანზე ყოველთვის ყველაფერს ვტოვებდი.. არა მხოლოდ ბოლო წლებში, როცა ყველაფერი მოვიგეთ, არამედ მანამდეც. ყოველთვის ვიბრძოდი და თავს ვწირავდი ამ მაისურისთვის, რათა თქვენთვის სიხარული მომენიჭებინა და ფეხბურთის საშუალებით გეამაყათ, რომ არგენტინელები ხართ.
ეტაპები სრულდება და ეს ერთ-ერთი მათგანია, რომელიც ძალიან მტკივა. მიყვარს, მიყვარდა და ყოველთვის მეყვარება ნაკრებში ყოფნა. ბოლომდე დავიცალე, მეტი აღარაფერი მაქვს გასაცემი და თანაც, უკან მოდიან ძალიან მაგარი ბიჭები, რომლებიც აქ ყოფნას იმსახურებენ.
მადლობა ამ 20 წლის განმავლობაში გამოჩენილი უდიდესი სიყვარულისთვის. ძალიან მომენატრება თქვენი ხმის გაგონება შიგნიდან [მოედნიდან]. ახლა უკვე მეც ერთ-ერთი თქვენგანი ვიქნები, რომელიც გუნდს გარედან ყოველთვის უგულშემატკივრებს და მხარს დაუჭერს (კარგსა თუ ცუდ დროში, მით უმეტეს).
მადლობა ჩემს ოჯახს, რომ ყოველთვის ჩემ გვერდით იყო და მახლდა ამ ულამაზეს, მაგრამ რთულ მოგზაურობაში. მადლობა თითოეულ მწვრთნელს, თანაგუნდელსა და ხელმძღვანელს, ვისთან ერთადაც მუშაობა მომიწია. თან მიმაქვს დაუვიწყარი მოგონებები და ერთად განცდილი მომენტები.
მივდივარ სიმშვიდითა და სიამაყით, რომ ჩემს თანაგუნდელებთან ერთად საოცნებო მომენტები გაჩუქეთ. ნამდვილი სიგიჟე იყო ამის თქვენთან ერთად განცდა. მიყვარხართ!
მადლობა ღმერთს, რომ არგენტინელი ვარ.
წინ, არგენტინა!
*ეს სიტყვები 21 ივლისს, ფინალიდან ორ დღეში დავწერე. დღეს, მამაჩემთან დაკავშირებული ამბის შემდეგ, იმაზე მეტად ვარ დარწმუნებული ამ გადაწყვეტილებაში, ვიდრე ოდესმე.“
