ჩემპიონთა ლიგის მე-2 ტურის შეხვედრაში ზალცბურგმა საკუთარ მოედანზე ბრესტი მიიღო.
მე-11 წუთზე მასპინძლებს ანგარიშის გახსნის შანსი ჰქონდათ, თუმცა VAR-მა სამსონ ბაიდუს გოლი არ ჩათვალა. 24-ე წუთზე კი აბდალა სიმას გოლით ანგარიში 0-1 გახდა და საბოლოოდ სტუმრებმა პირველი ტაიმიც ამ შედეგით მოიგეს.
მატჩის მეორე ნახევარში ფრანგულმა გუნდმა საკუთარი უპირატესობა კიდევ უფრო გაზარდა. 9-წუთიან მონაკვეთში ბრესტმა 3 გოლის გატანა მოახერხა.
66-ე წუთზე მაჰდი კამარამ გამოიჩინა თავი, 71-ე წუთზე აბდალა სიმამ დუბლი შეასრულა, ხოლო 75-ე წუთზე მატია პერეირა ლაჟემ შეძლო გოლის გატანა და ანგარიში გამანადგურებელი (0-4) გახადა.
საბოლოოდ შეხვედრა ასეც დასრულდა და ბრესტმა ჩემპიონთა ლიგაზე მე-2 მატჩიც მოიგო. პირველ ტურში ფრანგებმა გრაცის შტურმს სძლიეს 2-1.
ზალცბურგს კი 2 წაგება და 0-7 ბურთების ბალანსი აქვს.
პარალელურად გამართული თამაში შტუტგარტსა და სპარტა პრაღას შორის 1-1 დასრულდა. ორივე გოლი პირველ ტაიმში გავიდა. მე-7 წუთზე მასპინძელთა მხრიდან ანგარიში ენცო მილომ გახსნა, 32-ე წუთზე კი წონასწორობა კაან კაირინენმა აღადგინა.
2 მატჩის შემდეგ ჩეხურ გუნდს 4 ქულა აქვს, გერმანელებმა კი პირველ ტურში რეალთან მარცხის შემდეგ პირველი ქულა მოიპოვეს.
