ჩელსი საკუთარი ფეხბურთელის გოლის გამო გალანძღეს

ლონდონის ჩელსი გულშემატკივრების მხრიდან კრიტიკის ქარცეცხლში მოექცა.

მიზეზი კლუბის სოციალურ ქსელში გამოქვეყნებული პოსტი გახდა, რომელიც ინგლისისა და არგენტინის ნახევარფინალური მატჩის დროს ენცო ფერნანდესის მიერ გატანილ გოლს ეძღვნებოდა.

არგენტინელმა ნახევარმცველმა ინგლისთან შეხვედრაში ანგარიში გაათანაბრა, საბოლოოდ კი არგენტინამ თომას ტუხელის გუნდი 2:1 დაამარცხა და მუნდიალის ფინალში გავიდა. მატჩის მსვლელობისას ჩელსის გვერდზე საკუთარი ფეხბურთელის წარმატების აღნიშვნას ინგლისელი ქომაგების მყისიერი და გაბრაზებული რეაქცია მოჰყვა. გულშემატკივრებმა მიიჩნიეს, რომ ინგლისური კლუბის მხრიდან იმ გოლის ზეიმი, რომელმაც ეროვნული ნაკრები ტურნირიდან გამოაგდო, უადგილო და უპატივცემულო იყო.

„ინგლისური კლუბისგან ამის დაპოსტვა აბსოლუტური სირცხვილია,“ - წერდა ერთ-ერთი გაბრაზებული გულშემატკივარი პლატფორმა X-ზე (ყოფილ ტვიტერში). ზეწოლის შემდეგ ჩელსიმ პოსტი ოფიციალური არხებიდან სასწრაფოდ წაშალა, თუმცა მომხდარზე განმარტება არ გაუკეთებია.

ენცო ფერნანდესისთვის ეს არ არის პირველი შემთხვევა, როდესაც ნაკრებში თამაშის გამო სკანდალში ეხვევა. 2024 წლის კოპა ამერიკის მოგების შემდეგ, ის შეურაცხმყოფელი სიმღერების გამო სკანდალურ ისტორიაში გაეხვია, რის გამოც საჯარო ბოდიშის მოხდა და კლუბის შიდა დისციპლინარული სასჯელის მიღება მოუწია. ახლა კი ფერნანდესი მთელ ყურადღებას კვირას, 19 ივლისს გასამართი ფინალისკენ მიმართავს, სადაც არგენტინა ესპანეთს დაუპირისპირდება.