ჩელსის ხელმძღვანელობას ამ ზაფხულს თავდამსხმელებთან დაკავშირებით რთული გადაწყვეტილებების მიღება მოუწევს.
ამჟამად გუნდში ჟოაო პედრო, ლიამ დელაპი და მარკ გიუ ირიცხებიან, ხოლო ზაფხულში მათ სტრასბურგიდან ემანუელ ემეგა შეუერთდება. გარდა ამისა, ბაიერნიდან იჯარის დასრულების შემდეგ ლონდონში ნიკოლას ჯექსონიც დაბრუნდება.
The Telegraph-ის ინფორმაციით, 23 წლის ლიამ დელაპი მზადაა თავისი მომავლისთვის იბრძოლოს, თუმცა კლუბი მის გაყიდვას არ გამორიცხავს. ჩელსიმ ფეხბურთელი 30 მილიონ ფუნტად შეიძინა და ახლა მისი გასხვისების შანსი აქვს, რადგან დელაპის მიმართ ინტერესს არაერთი გუნდი გამოხატავს.
ახალგაზრდა შემტევისთვის სადებიუტო სეზონი საკმაოდ რთული აღმოჩნდა. აგვისტოში მიღებულმა ტრავმამ ის ორი თვით ჩამოაშორა მოედანს. პრემიერ ლიგაში ჩატარებულ 11 მატჩში მან მხოლოდ ერთი გოლის გატანა შეძლო.
მიუხედავად წარუმატებელი სტარტისა, დელაპს სჯერა, რომ ჩელსიში წარმატებას მიაღწევს და სეზონის პოზიტიურად დასრულებაზეა ფოკუსირებული. მისი მომავალი დიდწილად დამოკიდებული იქნება იმაზე, თუ ვის დანიშნავს კლუბი გათავისუფლებული ლიამ როსენიორის ნაცვლად. ამჟამად მთავარ კანდიდატებად ანდონი ირაოლა, მარკო სილვა და ჩაბი ალონსო განიხილებიან.
