ჩელსის ექსპერიმენტმა ევერტონთან არ გაამართლა

ჩელსის მთავარმა მწვრთნელმა გარისკა და მეორე ტაიმის დასაწყისშივე ვაბანკზე წავიდა, თუმცა მისმა გუნდმა მატჩი მაინც უშანსოდ წააგო.

ლიამ როსენიორმა განმარტა, თუ რატომ გადაწყვიტა შესვენებისას მალო გუსტოს ნაცვლად მოედანზე ალეხანდრო გარნაჩო გამოეყვანა.

ევერტონთან სტუმრად გამართულ შეხვედრაში ჩელსი პირველი ტაიმის შემდეგ 0:1-ს აგებდა. როსენიორმა მარჯვენა მცველი გუსტო მოედნიდან გაიყვანა და მის ნაცვლად გარნაჩო ჩართო, რამაც გუნდის სათამაშო სქემა შეცვალა.

მოისეს კაისედო მარჯვენა მცველის პოზიციაზე გადავიდა, ენცო ფერნანდესმა კი ნახევარდაცვის ცენტრში გადაინაცვლა. ამან კოულ პალმერს საშუალება მისცა ათიანის პოზიციაზე ეთამაშა, გარნაჩო და პედრო ნეტო კი ფლანგებიდან უტევდნენ. თავიდან ჩანდა, რომ ამ გადაადგილებამ გაამართლა, თუმცა ევერტონმა მალევე გაიტანა მეორე გოლი, ბეტომ დუბლი შეასრულა.

საბოლოოდ ილიმან ნდიაიემ ანგარიში 3:0 გახადა. როსენიორმა ამ საღამოს თავისი სამწვრთნელო კარიერის "ყველაზე იმედგაცრუებული მომენტი" უწოდა. ეს ჩელსის ზედიზედ მეოთხე მარცხი იყო ყველა ტურნირზე.

როსენიორის კომენტარი ტაქტიკურ ცვლილებაზე

„ჩემი ჩანაფიქრი ასეთი იყო: ვგრძნობდი, რომ თამაშს სრულად ვაკონტროლებდით, მაგრამ სიმწვავე გვაკლდა. მომენტები გვქონდა, ჯორდან პიკფორდმა წარმოუდგენელი სეივი შეასრულა და მეტოქის საჯარიმოს სულ უფრო ხშირად ვუახლოვდებოდით. გვსურდა შესვენების შემდეგ თამაში უფრო პოზიტიური გაგვეხადა და მოედანზე დამატებითი გარემარბი დაგვემატებინა.

მოისეს კაისედოს მარჯვენა მცველის პოზიციაზე ნდიაიეს წინააღმდეგ აქამდეც კარგად უთამაშია. როდესაც თამაშზე გავლენის მოხდენას ცდილობ, მსგავსი ცვლილებები აუცილებელია. ვფიქრობ, ამ როქმა მეორე გოლის გაშვებამდე იმუშავა კიდეც“, - განაცხადა როსენიორმა.

ჩელსის თავკაცმა ასევე დასძინა: „თამაშს კიდევ ერთხელ უნდა გადავხედო. მეტოქის საჯარიმოში ბევრჯერ შევედით, მაგრამ გადამწყვეტ მომენტში სიზუსტე გვაკლდა. მეორე გოლის დროს კი უპატიებელი შეცდომა დავუშვით. თუ სტატისტიკას გადავხედავთ, დარტყმებისა და მომენტების ნაკლებობას არ ვუჩივით. უბრალოდ, უფრო კლინიკურები უნდა ვიყოთ და ამაზე ბევრი მუშაობა მოგვიწევს“.