პრემიერ ლიგის დასკვნით ტურში ჩელსი უმნიშვნელოვანესი გამოწვევის წინაშე დგას. გუნდი სტადიუმ ოფ ლაითზე სანდერლენდს ესტუმრება. ჩელსის მომავალი სეზონისთვის ევროტურნირების საგზურის განაღდება სურს, რათა ახალ მთავარ მწვრთნელს, ჩაბი ალონსოს, რომელიც გუნდს ოფიციალურად მალე ჩაიბარებს, ევროპული პერსპექტივა დაახვედრონ.
მატჩის წინ ლონდონელთა დროებითმა თავკაცმა, კალუმ მაკფარლეინმა პრესკონფერენციაზე გულშემატკივრებისთვის სასიხარულო ინფორმაცია გააჟღერა და დაადასტურა, რომ გუნდს ერთბაშად სამი წამყვანი მოთამაშე უბრუნდება.
გუნდის საუკეთესო ბომბარდირმა, ჟოაო პედრომ, რომელმაც მანჩესტერ სიტისთან ასოციაციის თასის ფინალში მიღებული მცირე ტრავმის გამო ტოტენჰემთან მოგებული მატჩი გამოტოვა, პარასკევს გუნდთან ერთად სრული დატვირთვით ივარჯიშა. ბრაზილიელი შემტევი, რომელიც ფანების გამოკითხვით ჩელსის სეზონის საუკეთესო ფეხბურთელად დასახელდა, მზად არის მოედანზე გავიდეს.
ასევე მწყობრშია ცენტრალური მცველი ლევი კოლვილიც, რომლის ფიტნესსაც სამედიცინო შტაბი, ჯვარედინი იოგების მძიმე ტრავმის შემდეგ, განსაკუთრებული სიფრთხილით აკონტროლებს.
კიდევ ერთი პოზიტიური სიახლე კაპიტან რის ჯეიმსს უკავშირდება. მიუხედავად იმისა, რომ შუა კვირაში ტოტენჰემთან ის სათადარიგოთა სკამზე დარჩა, მაკფარლეინის თქმით, ჯეიმსმა პარასკევის სესია სრულად ჩაატარა:
რისმა დღეს ივარჯიშა. ის კარგ კონდიციაშია, თუმცა ფრთხილად უნდა ვიყოთ, რადგან მან თასის ფინალში ბევრი წუთი ითამაშა.
რაც შეეხება დანაკლისებს, ჩელსის სანდერლენდში კვლავ ვერ დაეხმარებიან ტრავმირებული ვინგერები - ესტევაო და ჯეიმი გიტენსი (ორივეს ბარძაყის კუნთის დაზიანება აქვს), ნახევარმცველ რომეო ლავიას თამაშიც დიდი კითხვის ნიშნის ქვეშ დგას.
