გავრცელებული ცნობების მიხედვით, ჩელსის მთავარი მწვრთნელი ენცო მარესკა, როგორც ჩანს, კლუბს დატოვებს, რადგან იტალიელსა და ხელმძღვანელობას შორის ურთიერთობა სერიოზულად დაიძაბა.
Sky Sports-ის, The Guardian-ისა და ფაბრიციო რომანოს ინფორმაციით, იტალიელს აღარ სურს კლუბში მუშაობის გაგრძელება მენეჯმენტთან ურთიერთობის გაუარესების გამო.
ჩელსის ბოლო პერიოდის ფორმა მნიშვნელოვნად გაუარესდა, გუნდმა პრემიერლიგის ბოლო შვიდ მატჩში მხოლოდ ერთი გამარჯვება მოიპოვა. დეკემბრის თვეში კი ყველა ტურნირის გათვალისწინებით რვა შეხვედრიდან სამი წააგო.
ასევე გასული თვის შუა რიცხვებში ევერტონთან გამარჯვების შემდეგ გაკეთებული კომენტარები კლუბის ხელმძღვანელობას არ მოეწონა. მარესკამ აღნიშნა, რომ ეს იყო მისი „ყველაზე მძიმე 48 საათი“ სტემფორდ ბრიჯზე მუშაობის განმავლობაში.
ჩელსის ბოლო მატჩი სამშაბათს ბორნმუთთან 2:2 დასრულდა, რის შემდეგაც იტალიელმა მწვრთნელმა მედიასთან არ ისაუბრა. მიუხედავად იმისა, რომ ასისტენტმა ვილი კაბალიერომ განაცხადა, თითქოს მარესკა შეუძლოდ იყო, ზოგი ფიქრობს, რომ მან პრესკონფერენცია შეგნებულად აიცილა, რადგან კლუბში საკუთარ მომავალზე ფიქრობდა.
მატჩის განმავლობაში გულშემატკივრები განსაკუთრებით გაღიზიანდნენ, როცა იტალიელმა შეხვედრის დაახლოებით მე-60 წუთზე კოულ პალმერი შეცვალა.
ტრიბუნებიდან ისმოდა სკანდირება: „შენ არ იცი, რას აკეთებ“, რომელიც 45 წლის სპეციალისტისკენ იყო მიმართული. მარესკა ჩელსიში გასული სეზონის დასაწყისიდან მუშაობს.
არსებობს მოსაზრება, რომ იტალიელი აღარ იჯდება სათადარიგოთა სკამზე, როცა ჩელსი კვირას მანჩესტერ სიტის დაუპირისპირდება, ეს ლონდონური კლუბისთვის იანვრის ცხრა მატჩიდან პირველი იქნება.
მარესკამ გუნდი გასულ სეზონში უეფას კონფერენს ლიგისა და ფიფას საკლუბო მსოფლიო ჩემპიონატის გამარჯვებამდე მიიყვანა, ასევე ჩემპიონატში საუკეთესო ოთხეულში შეიყვანა. ამჟამად ჩელსი პრემიერლიგაში მეხუთე ადგილზეა და ლიდერ არსენალს 15 ქულით ჩამორჩება.
