ჩეფერინის კრიტიკა: „მსაჯი ფსიქიატრი არ არის, რომ განზრახვა გამოიცნოს“

უეფას პრეზიდენტი ალექსანდრ ჩეფერინი ვიდეორეფერის შემოღების შემდეგ მსაჯების მიერ მიღებულ არათანმიმდევრულ გადაწყვეტილებებს ვერ ეგუება.

მადრიდში გამართულ კონფერენციაზე, The Forum, სლოვენიელმა ფუნქციონერმა სისტემის მიმართ კრიტიკა არ დაზოგა.

ჩეფერინის თქმით, წესების განსხვავებული ინტერპრეტაციები გულშემატკივრებში დიდ გაუგებრობას იწვევს, რაშიც ის მათ სრულად ეთანხმება. უეფას პირველ პირს მიაჩნია, რომ განსაკუთრებული ქაოსი ხელით თამაშის წესმა გამოიწვია:

ამას უკვე მე თვითონაც ვეღარ ვიგებ. ზოგჯერ გულშემატკივრები ვერ ხვდებიან, რატომ იცვლება წესების ინტერპრეტაცია ერთი მატჩიდან მეორემდე , და მე მათი მესმის. განსაკუთრებით ხელით თამაშის წესი.. ვერავინ ხვდება, არის ეს პენალტი თუ არა? განზრახ იყო თუ არა? ეს როგორ უნდა გაარკვიო? ფსიქიატრი ხომ არ ხარ?!

58 წლის ჩეფერინმა ხაზგასმით აღნიშნა, რომ საბოლოო სიტყვა ყოველთვის მოედანზე მყოფ არბიტრს უნდა ეკუთვნოდეს. მისი თქმით, VAR-ი მხოლოდ აშკარა და თვალსაჩინო შეცდომების შემთხვევაში უნდა ერეოდეს საქმეში. მან მაგალითად ესპანეთისა და ინგლისის ჩემპიონატები მოიყვანა, სადაც გადამოწმების პროცესი ზედმეტად ჭიანურდება:

ვიდეორეფერმა მხოლოდ აშკარა შეცდომების დროს უნდა იმოქმედოს. ეპიზოდების განხილვა უნდა იყოს ხანმოკლე და არა ისე, როგორც ლა ლიგაში ან პრემიერ ლიგაში ხდება, სადაც მატჩები ხშირად 10-15 წუთით წყდება

უეფას პრეზიდენტი მიიჩნევს, რომ შეცდომების მინიმუმამდე დასაყვანად ერთადერთი გზა IFAB-ის წესების თანმიმდევრული და ზუსტი გამოყენებაა.