ჩრდილოეთ ირლანდიის მოთამაშე: "ვფიქრობ, სამართლიანობამ იზეიმა"

ერთა ლიგის სტარტზე საქართველოს ნაკრებთან მინიმალური ანგარიშით (0:1) მოპოვებული გამარჯვების შემდეგ, ჩრდილოეთ ირლანდიის ნაკრების შემადგენლობაში გამარჯვების გოლის ავტორმა ში ჩარლზმა კომენტარი გააკეთა.

მან აღნიშნა:

ჩემს ემოციებს სიტყვებით ვერ გადმოვცემ. დიდი ბრძოლა გადავიტანეთ. მეტოქეს ბევრი მომენტის შექმნის საშუალება მივეცით, მაგრამ მაინც გავიმარჯვეთ. ჩემი ძმა (პირს ჩარლზი) შესანიშნავი იყო. პენალტი მოიგერია და რამდენიმე მნიშვნელოვანი სეივიც შეასრულა, თუმცა აუცილებელია აღვნიშნო დაცვის ხაზის ბრწყინვალე თამაშიც.

ვფიქრობ, სამართლიანობამ იზეიმა. ერთი სული მაქვს, ბელფასტში როდის დავბრუნდები. საქებარი სიტყვები იმ 60 გულშემატკივარს, რომლებიც აქ ჩამოვიდნენ.

შეგახსენებთ, რომ შეხვედრის მიმდინარეობისას ჩრდილოეთ ირლანდიის მეკარე პირს ჩარლზმა ხვიჩა კვარაცხელიას მიერ შესრულებული თერთმეტმეტრიანი მოიგერია და ასევე გიორგი მიქაუტაძეს ურთულესი ბურთი აუღო.