"ჩვენ მხოლოდ იტალიასა და საქართველოზე არ ვიფიქრებთ" - რუმინეთის მწვრთნელი

საქართველოს ნაკრები 2027 წლის რაგბის მსოფლიო თასის ჯგუფში ტურნირის ბოლო ორი გათამაშების (2019 და 2023) ჩემპიონ სამხრეთ აფრიკასთან, იტალიასთან და რუმინეთთან ერთად მოხვდა.

რუმინელთა მთავარმა მწვრთნელმა, დავიდ ჟერარმა ჯგუფის შესახებ კომენტარი გააკეთა:

"თუ სამხრეთ აფრიკასთან სათამაშოდ ისე მოვემზადებით, თითქოს მსოფლიო ჩემპიონებთან თამაში ოცნება იყოს, ეს ნამდვილი კოშმარი იქნება! ყველა თამაში კონკურენტუნარიანები უნდა ვიყოთ. უნდა შევწყვიტოთ იმის აღქმა, რომ მათთან თამაში მიღწევაა. არა, მიღწევა ის იქნება, თუ კონკურენციას გაუწევ.

თუ ხალხი ფიქრობს, რომ რუმინეთი მხოლოდ საქართველოზე და იტალიაზე გაამახვილებს ყურადღებას, ვფიქრობ, ეს სპორტისადმი უპატივცემულობაა. თუ რაგბის პატივს ვცემთ, კონკურენტუნარიანები უნდა ვიყოთ.

მე აქ ტურისტად არ ვარ, ავსტრალიაში არ მივდივარ იმ ადამიანებთან ერთად, რომლებსაც უბრალოდ იქ ყოფნა და ტელევიზიით გამოჩენა სურთ. მინდა, ჩემმა მორაგბეებმა, რომლებსაც სათანადო დონე აქვთ, 3 თამაშისთვის თავი გაწირონ", - განაცხადა ჟერარმა.

საქართველოს ნაკრებს რუმინეთთან ისტორიაში 15 ურთიერთშეხვედრა აქვს ჩატარებული - 13 მოგება, 1 ფრე და 1 წაგება. ბოლო ორი მატჩი (2024-ისა და 2025-ის მარტში) მეტოქეს ერთნაირი ანგარიშით მოვუგეთ - 43:5.

2027 წლის მსოფლიო თასზე სულ 6 ჯგუფია, თითოეულიდან 2-2 საუკეთესო პლეი-ოფში პირდაპირ გავა, ასევე ამავე საგზურს მიიღებს 4 საუკეთესო მესამეადგილოსანიც.

ისტორიაში რიგით მე-11 მსოფლიო თასი ავსტრალიაში, 1-ელი ოქტომბრიდან 13 ნოემბრის ჩათვლით, გაიმართება.