დასანანი მარცხი - ბასილაშვილი ბაშტადის ტურნირს გამოეთიშა

ნიკოლოზ ბასილაშვილმა ბაშტადის 250-ქულიან ტურნირზე გამოსვლა 1/8 ფინალურ ეტაპზე დაასრულა.

ქართველმა ჩოგბურთელმა 1/16 ფინალში დიდ ბრიტანელ იან ჩოინსკის ორ სეტში აჯობა, 1/8 ფინალში კი არგენტინელ აგუსტინ ტირანტესთან რთულ 3-სეტიან ბრძოლაში დამარცხდა.

პირველი სეტი ტირანტემ მე-11 გეიმში შესრულებული ბრეიკით მოიგო, მეორეში ნიკა უკეთესი იყო, ხოლო მესამე პარტიაში თავისი ჩაწოდება ბოლო გეიმში დათმო და თამაშიც დასრულდა - 5:7; 6:3; 4:6.

ბასილაშვილს მიმდინარე წელს ყველაზე წარმატებული ტურნირი რომში ჰქონდა, როცა კვალიფიკაციიდან 1/8 ფინალურ ეტაპამდე მივიდა - ანდრეი რუბლიოვთან დამარცხდა.